No mester busca escusa di Klapchi pa mal cuido di mascotanan durante fin di aña

Durante fin di Aña na Aruba ta un tradicion cu ta tira klapchi p’asina core cu e asina yama “fucu” esta e mala suerte y e cosnan malo cu a pasa durante e aña. E tradicion aki tin sigur siglonan tras di siglo ta andando. Claro mientras e añanan ta pasando a cuminza regula e venta y hasta e tiramento di klapchi. Sinembargo, ultimo aña a bin ta scucha masha hopi gritonan cu ta bisa cu e klapchi ta perhudica e cachonan y pushinan y otro bestianan. Pero loke ta haci e situacion aki fastioso ta e hecho cu diripiente ultimo añanan klapchi ta un molester pa mascotanan, haciendo bo pensa cu durante e siglo y siglonan cu tin tiramento di klapchi, ta manera cu no tabatin cacho cu pushi y otro bestianan riba nos isla. Diripiente cierto gruponan den comunidad a bin ta sali na vanguardia di e bestianan aki, loke no tabata pasa anteriormente, y claro ta di aplaudi cu e gruponan aki ta sali na nan vanguardia pero si ta sali na vanguardia di e bestianan, sali tur ora nan nan vanguardia, pasobra ta conoci cu ta recoge e bestianan for di riba caya pa opera nan pero despues ta bolbe bahanan riba caya bek, pues e problema a haya un solucion temporario.

Por a mira riba Facebook cada momento un persona ta pone cu cacho a perde pa motibo di sonido duro di klapcihi y practicamente Facebook a bira un style di Dog Book. Pero si nos mira cu tin e ley di Cacho cu cachonan mester ta sera den un cura adecua pa nan no ta cana riba caya, esaki ta mustra cu akinan doñonan di cacho NO ta cumpli cu esaki. Paso berdad cu durante temporada di klapchi tin mas cacho ta bai for di cas, pero nos mester ta sincero tambe cu durante henter aña Facebook ta yen tambe di cachonan cu a bai for di cas. Loke nos kier enfatisa akinan ta cu nos mester stop di busca tur excusa pa sconde e mal cuido of di no tin un luga of cura adecua pa tene un cacho of pushi aden. Pasobra after all ta tur aña den fin di December tin tiramento di klapchi cu un biaha mas no ta for di aña pasa a cuminsa cu esaki sino siglo y siglo atras.

Ban ta sincero cu nos mes y percura mas miho pa bo mascotanan den tur sentido y no solamente den periodo di tiramento di klapchi. Veterinarionan tin tur sorto di pilder pa e bestianan aki por sinti nan mes tankilo durante e dianan di tiramento di klapchi dus haci uso di dje y sigur sigur tin doñonan di mascota cu si ta haci uso di esakinan y no tin problema cu e cacho of pushi a bay for di cas. Tin doñonan di cacho cu pushi y otro bestianan no tin problema cu e situacion aki pasobra nan si ta percura pa cuida y tene nan mascotanan bon cera y bon protegi pa e periodo cu ta apenas un siman den henter un aña cu ta tira klapchi.

Comments

comments