No mas UTV den Parke: Mas enfasis awo riba recreacion sostenibel

Ta posibel pa drenta cu Jeep ainda pero den futuro lo sigui regula esakinan tambe.

Manera conoci, despues di awe, no ta permiti pa drenta cu vehiculo di UTV mas den Parke.
Conforme e ‘Managing Nature Conservation’, e plan di maneho cu Fundacion Parke Nacional Aruba a introduci entrante 1 di Juni, ta conoce un otro punto di interes cu despues di awe 31 di October, vehiculo UTV no lo tin acceso na e area protegi di parke nacional Arikok. Esaki tambe ta den cuadro cu maneho unda Parke ta bay enfoca hopi mas riba recreacion sostenibel, segun Carl Quant, Marketing, Sales & Communications Manager na Parke Arikok.

Tin dos tipo di UTV, esun cu bo ta huur pa bay tour of uno cu bo ta huur pa bay individual riba bo mes, cual dado momento esey su percentahe di huur ta mas halto. Awo ora turista yega Parke, e pregunta ta keda si tin otro opcion awo pa core den Parke awo cu no por drenta cu UTV. “Desde 1 di Juni nos a hiba un campaña basta estrecho pa comunica cu tur nos partners na varios ocasion, y berdad ainda nos a ripara cu tin turista cu ta huur UTV individual”, sr. Quant ta bisa.

Parke a wordo instrui con pa maneha esaki y na momentonan aki ora nan yega ta splica nan e proceso y plan di maneho cu Parke a introduci pa cu recreacion sostenibel dentro di Parke. “E aspecto cu nos ta enfoka na dje ta pa disfruta di naturalesa na un manera sostenibel. Pues hunto cu nos departamento di recreacion sostenibel nos a amplia e hiking trails cu nos tin, awor nos tin ocho cu nos a marca completo”, sr. Quant ta bisa. Esakinan ta un loop di centro di bishitante por cana bay Dos Playa bin bek, ofreciendo tur otro alternativanan.

Ta posibel pa drenta cu Jeep ainda pero den futuro lo sigui regula esakinan tambe. Na momentonan akinan e punto importante ta pa sigui comunica cu tour operators y tur partners pa asina trece informacion. Parke lo reuni cu Aruba Tourism Authority pronto caminda lo por hunto cu nan spera di trece e mensahe aki localmente y internacionalmente na momento cu nos turistanan haci research riba pais Aruba.  Pasobra Parke ta haya importante pa turistanan sa prome cu nan bishita kico nan por spera, poniendo e expectativanan aki claro y na un manera hopi visibel pa nan, cual lo sigur lo engrandece nan experiencia na momento di bishita Parke, segun sr. Quant ta splica.

Balans entre recreacion y impacto na naturalesa
Papiando cu Aruba Offroad Foundation nos por a compronde cu awor cu tour operators no lo drenta cu UTV mas, esaki ta bay crea tambe un buraco financiero pa Parke. Nan tabata yuda Parke genera 3 miyon florin pa aña. ‘Esaki ta bay bek den e cuadro di recreacion sostenibel. Nos tin partners nobo cu a aplica pa ta tour operators caminda cu nan enfoke ta hopi biaha riba recreacion sostenibel. Na banda di esaki mi sa tambe di algun partners cu a cambia nan modelo di opera di tal forma caminda nan por sigui opera dentro di e area di Parke”, segun sr. Quant. Ora bo papia di recreacion sostenibel, e ta sigui splica cu hopi biaha ta pensa riba hiking so, pero mester tene cuenta cu Parke den proximo simannan lo sigui determina kico tur lo cay bao di recreacion sostenibel ‘low impact’ pa por sigui den contacto cu otro tour operators y keda na un nivel cu e balans entre recreacion y impacto riba naturalesa no ta mesun grandi.

“Di parti di Parke, nos a ripara sigur den e ultimo tempo, y mi ta kere COVID tambe a trece esaki cu ne cu no solamente localmente, pero internacionalmente a mira con naturalesa a florece un bes mas”, segun sr. Quant.

Kinan no ta limita solamenta na e aspecto di flora pero sigur fauna tambe. Pa Parke, diariamente nan ta ripara con e actividad di nos fauna ta hopi mas presente.  “Nos ta papia akinan no solamente di especienan endemico, pero tambe di parhanan migratorio caminda cu diariamente nos ta mira algo di parhanan nobo cu ta yegando areanan di Parke”, sr. Quant ta agrega.

Pa locual ta e enfasis awo riba recreacion sostenibel, Parke ta laga sa cu nan tin hopi partners nobo cu a registra pa hiba actividadnan na un manera sostenibel dentro di Parke. “Ta analisa akinan e aspecto di hikings, tin partners cu ta haciendo e-mountain bike tours caminda fin di siman nos a hiba nos prome actividad cu nan. Esaki ta un bicicleta cu ta pedal-assist, cu ta yuda e persona cu mester un tiki forsa mas pa asina subi e seronan”, segun sr. Quant.

Tambe pa loke ta trata bishitante, Parke tin hopi mas walk-ins di turistanan cual ta hopi interesante. Nos localnan tambe e cifranan a aumenta drastico, entre 16% pa 20% di localnan cu ta bishita e area. Internacionalmente a ser proba cu actividadnan den naturalesa ta actividadnan cual personanan ta pusha mas p’e, beachnan, parkenan y reservanan natural. Y akinan ta unda cu Parke tin hopi mas contacto cu e comunidad di Aruba. Nan ta ricibi varios email y mensahe tocante pregunta riba e areanan pa siña mas di e diverso bunitesa di nos naturalesa.

Comments

comments