Hefe di Departamento di Prevension di Bombero, sr. Ferdinand Ponson, ta pidi mayornan y otro figuranan responsabel pa no laga muchanan nan so den cas durante temporada di vakantie.
Sr. Ponson ta duna ehempel di muchanan cu kier cushina ora mayornan no ta presente, cu nan ta keda mucha y nan por wordo distrai hopi lihe, poniendo nan mes involuntariamente den peliger. E ta sugeri pa cumindanan wordo prepara di antemano cu e mucha por simplemente uza e microwave por ehempel pa calenta nan cuminda.
Locual cu ta yamando hopi atencion durante añanan caba den temporada di vakantie ta muchanan cu ta keda completamente cera den cas, pasobra mayornan no tin hende pa wak pa nan. Cualkier cos cu por sosode den e cas manera den e ocasion cu un candela mester tuma lugar, e muchanan no tin forma pa scapa.
Sr. Ponson ta sigui splica cu den e ocasion cu bisiñanan mester haya nan mes den un situacion iregular asina, nan por yama 911 of 100, kendenan lo tuma contacto inmediato cu Cuerpo di Bombero. Nan lo atende cu e situacion di un manera sigur pa saca e mucha for di e cas.