Ta hopi di lamenta cu si algo bay robes cu Serlimar tur hende ta bula, pero awor cu tin tres dump ilegal na Parkietenbos, niun musca ta bula. Sr. Lionel Croes di Serlimar ta splica.
Tur hende sa nan deber y nan responsabilidad, cu mester tuma accion na un manera responsabel si berdad kier tin un maneho di desperdicio cu ta wordo tira unda cu ta. En berdad tin companianan cu ta haci negoshi cu desperdicio, cu ta nan derecho, cu ta nan inversion ya cu tur hende ta haci negoshi pa gana placa. Pero no por accepta cu desperdicio ta wordo tira den un forma inhumano y naturalmente no na manera responsabel, no na Parkietenbos, den un afan pa gana placa.
Tur hende sa, cu desde luna di Maart, cu e compania Ecotech no ta haciendo uzo di Parkietenbos, pa e simpel hecho cu kisas e no kier paga, pa e servicio aki. Pasobra si ta genera entrada, ta mas cu claro, cu ora cu bin Parkietenbos, mester paga e fee. Sr. Croes ta sigui bisa cu , ta bin e pregunta e ora y e preocupacion ta lanta, cu si e dia di mañan, por duna e autorisacion pa ken cu ta por haci negoshi, e por ta vulnerabel pa motibo cu ta hungando cu salud di hende.
Ta conoci cu Parkietenbos ta pasando den angustia pa hopi tempo caba, pero ta keda un biaha mas na gobierno, pa autoridadnan competente pa yega na un solucion a largo plaso, pa e problematica aki cu ta azotando e pais.
Pero si a nota cu no tin niun musca ta bula den instancianan concerni, cu tin cu asumi nan responsabilidad. Ta manera cu si bo no por asumi e responsabilidad aki, pa ataca y ranca orea di esunnan cu ta haciendo e acto aki inhusto, contra di ley, anto e ora ey nos ta robes bezig.
Serlimar no ta e instancia cu ta bay pa atende pa cu e situacion aki. Tin departamentonan, y tur a wordo avisa y notifica, e ta un preocupacion. Por a ripara cu tin hopi musca bulando, y e desperdicio tin su manera di wordo proceso, e ta wordo tapa cu santo. E proceso aki ta zorg pa no tin problema cu musca. E problema ta e huma, e candela cu tin na superficie cu tin cu wordo traha na un forma responsabel pa ora e biento bolter, e ta causa molester na e habitantenan di Parkietenbos, segun Sr. Lionel Croes, vocero di Serlimar.