Diadomingo durante nan yegada, turistanan a topa cu un aeropuerto bao di awa, cual a hala masha hopi atencion den medionan social. Hendrick Croes, vocero di AAA, a splica cu debi na e cantidad di awa cu a cay, tabata tin influencia pa pais Aruba y tambe aeropuerto di Aruba tambe. El a agrega cu mirando e cantidad di awa cu a cay na Aruba, damnan a yena, tur e rooinan, e sistema di riolering, tur cos a overflow y tur e sistema aki a conecta hunto cu e sistema di aeropuerto, unda cu awa den su ruta normal lo mester a pasa.
Si full e sistema di Aruba overflow, topa cu esun di aeropuerto, ta overflow esaki di biaha. Ta pasa cu e awa cu ta sali for di aeropuerto, no tin ningun caminda pa bay, ta drenta bin bek direccion di aeropuerto. Esey ta loke a sosode. Contrario na loke hopi hende a pensa cu ta e mesun situacion cu a sosode algun tempo atras, unda cu awa tabata cay for di plafond, un situacion basta fastioso pa aeropuerto di Aruba. Tur esaki a wordo drecha e tempo eynan. Esey no ta loke a sosode un biaha mas. Tabata puramente consecuencia cu e awa a overflow den e sistema, e ora e awa a bin bek. No tabata tin lekkage. E situacion incomodo a tuma luga solamente den e area unda cu e tiendanan ta, unda cu e restaurantnan ta. No ta asina cu ta full aeropuerto tabata bao di awa. No ta asina cu tur e otro pisonan a sufri daño, cual no tabata e caso. Ta contento si, cu den un momento asina, aeropuerto den su totalidad a uni y ta percura pa drecha e situacion mas lihe cu ta posibel. Ya pa mas of menos 11’or di mainta, e situacion a stabilisa, unda cu a kita e awa pa asina e pasaheronan por a pasa segun e rutanan tradicional. Aeropuerto no a cera, no a sufri ningun retraso, no tabata tin ningun influencia den e aspecto eynan pa aeropuerto di Aruba, djis mester a percura pa e awa por a wordo saca, door di pomp e awa cu tabata drenta na e momento eynan.
Con nos ta bay haci pa futuro, pa asina esaki no ripiti. Sr. Croes a splica cu ya tin reunion a tuma luga pa asina busca solucion pa futuro pa algo asina no pasa mas.
Awe mainta mes a tuma luga un reunion hunto cu e otro contratistanan cu tambe a traha na aeropuerto pa mira con por bay soluciona esaki, pa preveni pa esaki sosode den futuro. Mirando cu en berdad e tin su consecuencianan. Videonan cu por a mira riba Facebook a mustra un situacion caotico y deplorabel, pero ta contento cu esaki a sosode den un lapso toch cortico, mirando cu tabata un situacion un tiki for di control di nos tur, pasobra cu ta e cantidad di awa cu a cay riba pais Aruba, ta loke a bin cu e consecuencianan aki.
Pa loke ta bira e parti unda cu a percura pa saca e awa bek, ta contratistanan mes a wordo yama aden, unda cu nan mester a trece e pompnan pa por a pomp e awa, sake mas lihe cu ta posibel. Aeropuerto ta contento y satisfecho caminda cu por a mira cu tur hende cu ta traha na aeropuerto tin e amor pa aeropuerto, tin amor pa turismo y tin amor pa haci e trabao pa asina cu e situacion na aeropuerto por a normalisa y stabilisa mas lihe cu ta posibel.
No tabata tin daño despues di e caida di awa, unda cu despues a saca tur e awa afo, a pasa controla cerca tur e tiendanan. Ta e piso full abao esaki a tuma luga. A pasa controla tur e tiendanan si nan tabata tin daño y si tabata tin nan lo avisa aeropuerto. No tabata tin daño grandi. Solamente cu tin algun ekipo cu ta muha, pero eseynan una bes cu nan seca, nan ta sigui traha normal, segun Croes.