Nicole Lake, e muhe di 24 aña cu a huy di e seccion femenino di prizon SDKK (Bon Futuru), dia 28 di october, a hacie pasobra e personal a ignor’e. E tabata rekeri atencion medico despues di un accidente cu a lag’e cu problema pulmonar. Asina Vigilante a afirma, cu tabata presente diaranson den corte.
A dun’e ordo pa aparece den corte, acusa di huymento di prizon y hortamento di vehiculo. Ministerio Publico a exigi’e cuater aña di prizon, pero finalmente a dun’e dos aña menos prizon preventivo.
HUY
Nicola a afirma cu e tabata pidi bishita di dokter tur dia, pero gerencia y e empleadonan di prizon tabata ignora su peticionnan. Segun Nicolas, esaki a conduci na su intento desespera di huy.
El a subi dak di e seccion y a bula den e hofi, pero inicialmente no a logra scapa, pasobra e mester a bay bek n’e seccion di hende muhe. Despues el a bolbe subi riba dak y a caba den e seccion di stranhero.
Eynan el a sconde bao di un container for di atardi te anochi. Segun Nicole, tabata e Venezolanonan kendenan tabata sa cu e tabata scondi eynan y a yud’e pa huy ora cu e bewakernan no tabata cerca.
Despues Nicole a core te n’e rand di Kaya Shers, caminda cu un peaton conoci a hib’e te na Caracasbaai. E acusado a indica cu no tabatin ningun hende tabata ward’e pa yud’e huy.
Mas despues, e y su ruman homber Sambo a paga un hende pa hib’e San Pedro caminda finalmente a arest’e. Durante su aresto, a haya droga den su tas, pero Nicole a indica cu e mes no ta tuma droga. El a bisa cu e droga tabata den su tas pa hib’e pa un otro persona.