Nicolas Maduro a ordo diahuebs, un accion defensivo den ocean Atlantico como resultado di e yegada di un bapor di guera Britanico n’e costanan di Guyana. E echo a lanta un biaha mas e tension entre e paisnan Sur Americano cu tin un disputa teritorial.
“Mi a ordo e activacion di un accion conhunto di henter e Forsa Arma Nacional Bolivariano (FANB) riba Caribe oriental di Venezuela, riba e fachada Atlantico. E lo ta un accion conhunto di caracter defensivo como resultado n’e provocacion y n’e menasa di Reino Uni contra paz y soberania di nos pais,” el a bisa.
A haci e anuncio dilanti e cupula militar, durante un reunion cu a transmiti di manera obligatorio na radio y television. Eynan a comunica cu un grupo di efecto Castrense cu a concretisa “e prome fase” di e operacion aki. E prome etapa a consisti den un despliege riba tera y awa di estado Sucre.
Maduro no a duna detaye riba e alcance y duracion di e operacion aki contra e bapor na Guyana. Sinembargo, el a insisti cu e yegada di HMS Trent Britantico ta un “menasa inaceptabel.” Fuera di esey un “ruptura” di e acuerdonan cual el a subscribi cu su colega Guyanes, Irfaan Ali, dia 14 di december ultimo. E momento ey nan a compromete pa no menasa otro mutuamente y evita incidente relaciona cu e disputa.
“Venezuela no por keda cu brasa crusa dilanti un menasa, nos ta respondiendo n’e medida proporcional,” el a sigura despues di a reitera cu e ta boga pa diplomacia y paz.
E lider a critica cu Guyana no a duna oido n’e peticionnan di Venezuela di no acepta e yegada di e bapor Britanico na su costanan.
Algun minuut prome, Maduro a condena e echo den un comunicado, caminda cu el a pidi Guyana “pa tuma accion inmediato p’e retiro di e bapor. Tambe, el a pidi abstene pa sigui envolve e potencianan militar den e controversia.”
E disputa a escala despues cu Venezuela a aproba dia 3 di december, den un referendum unilateral, door di anexa e zona bao pleito. Ta trata di un area di casi 160 mil kilometer cuadra cu ta bao di control di Guyana y cual controversia ta den man di Corte Internacional di Husticia.