BRASIL – E delantero Brasilero Neymar a presenta diadomingo bek na e concentracion di e seleccion Brasilero cu ta preparando pa Copa America despues di e disfruta di un jornada di descanso y un dia despues di a wordo acusa di a viola un hoben cu cual e tabata tin un encuentro na Paris.
E helicopter luhoso di propiedad di e hungado di Paris Saint German a baha pa 12 ora local diadomingo cerca di Granja Comary, un centro moderno di entrenamento di Canarinha den e ciudad Teresopolis, na 98 kilometer di Río de Janeiro.
A pesar di e mal tempo diadomingo, e helicopter a logra pasa door di un neblina pisa y baha Neymar y algun di su compañeronan di seleccion, manera e lateral Dani Alves, e defensa Thiago Silva y e centro campistanan Paquetá y Arthur.
Neymar tabata un di e ultimonan pa baha for di e helicopter y a cana bay trankilamente na e van cu a hibanan pa nan luga di entrenamento.
E hungado di PSG a bolbe bek na La Canarinha un dia despues di cu’n hoben Brasilero a acus’e di a viol’e den un hotel di Paris, unda cu el a bay pa topa cu e hungado despues di a conoce riba internet y esaki a amnde pasashi.
E supuesto victima a presenta diabierna un denuncia den un warda di polis na Sao Paolo unda cu e ta declara cu e supuesto crimen a tuma luga dia 15 di mei ultimo na Paris.
Den su defensa, Neymar a publica tur e mensahenan cu el a intercambia cu e hoben, incluso di e dianan despues di e supuesto violacion. El a reconoce di a tene relacion sexual cu e hoben y a bisa di ta victima di un intento di extorsion y di a cay den un “trampa”.
E tata di Neymar, Neymar da Silva Santos, a afirma cu representenan di e supuesto victima a drenta den contacto cun’e pa exigi’e placa a cambio di garantisa e silencio di e hoben.