Dia 15 di December na oficina di New india Assurance a tuma luga un evento caminda e artista multifacetico, Charitto Chavez, a haci entrega di e potretnan cu el a pinta, oleo riba canvas, na e personahenan cu ta aparece riba e calendario 2017.
Esaki ta e di 17 aña consecutivo cu New India ta lansa su calendario di personahenan, celebrando asina ey e gran pontencial di nos comunidad.
Pa Januari nos por mira Monica Pimentél, kende a representa Aruba den e deporte di Taekwondo na Rio 2016, sigui pa Annabel van Westerop, No. 3 di mundo den Freestyle Kite Boarding. Luna di Maart ta mustra Mikel Schreuders kende a clasifica pa Rio 2016 den natacion, April ta presenta Jocelyn Martinez, pintor autista y na Mey ta figura Urvin Croes, nos Iron Chef. Na Juni por aprecia Annelaine Jacobs hungado di ahedrez sobresaliente y gran deportista y Juli ta brinda Jesus David de Marchena Acevedo, kende a participa na Weganan Paralimpico di e aña aki, sigui pa Tracey Pietersz, bailarina y despues ta haya Gregory Milliard, Campeon Mundial di MMA. October ta dedica na Shamira Raphaela, trahado di pelicula. Na November nos tin Jonathan Thiel, miho conoci como Jeon, cantante y musico y ta termina e aña cu Jayme Mata, kende tambe a representa nos dushi isla na Rio 2016 den e deporte di Judo.
Pueblo di Aruba ta keda cordialmente invita pa libremente pasa busca nan ehemplar na oficina di New India Assurance of cerca un di su brokernan.
Kaveri Raghunath, Managing Director di New India Aruba, despues di a yama tur hende bon bini y a haci uzo di e oportunidad pa haci entrega di un check na representantenan di Rode Kruis Aruba, Jurgen van Schaijk y señorita Nicole, pa asina duna aporte na e campagna “Hunto nos ta Yuda” pa e ciudadanonan cu a sufri perdida di nan pertenencianan durante e temporada di yobida masha pisa mes poco tempo pasa.
Despues di e celebracion, e Directora a yama danki na e personahe y nan representantenan y regala cada uno un bunita Christmas Basket.
New India ta gradici henter comunidad pa e aceptacion ricibi durante mas cu 50 aña y ta desea un y tur dianan di fiesta yena cu bendicion, luz y amor.