Esaki ta e di 19 aña consecutivo cu e compania di seguro ta ofrece na pueblo di Aruba un calendario special, semper un homenahe na nos dushi tera, como muestra di aprecio y gratitud pa e aceptacion cu New India, for di principio, ya mas cu 55 aña pasa, a ricibi di nos clientela specialmente y di henter nos comunidad en general.
E aña aki e artista plastico,Charitto Chavez, a scoge pa pinta paisahenan local masha bunita mes.
Nos ta habri aña cu e mansion di Dundun Ecury, cu ta data di aña 1929, simbolo di prosperidad y nos ta keda den e mesun bario cu e famoso forn’i calki di Rancho.
No mucho leu di eynan nos por admira e arkitectura tipico di siglo pasa di un cas di ciudad . E cas aki tabata anteriormente den Caya Betico Croes, banda di Aruba Bank y el muda na e luga nobo en conexion cu plannan di Aruba Bank pa expande.
Pa april, luna cu nos Rey Willem Alexander ta haci aña, nos ta bay te na e Ruinanan di Bushiribana, caminda nan tabata dirti oro saca for di nos mina di oro y caminda Aruba a brinda un concierto impresionante pa nos rei, algun aña atras, ora el a honra nos cu su bishita hunto cu su señora Reina Maxima.
Di ey nos ta bolbe centro di playa pa mira e toren di e kerki protestant bieu, construi na aña 1846, cu nan a caba di restaura pa asina sigui nos caminda pa goza di e refleho sublime di e matanan di Koningin Wilhelmina Park den e awa na banda. Bayenda un tiki mas pariba, ata un pasaihe bunita di nos costa zuid!
Awo nos ta sigui nos caminda te na California pa wak un piedra grandi cu parce un dori cu den fondo nos faro glorioso, cu tambe a keda restaura poco tempo pasa. Siguiendo e litoral (kustlijn) nos ta yega na un boca di costa nort cu ta casi kita bo rosea di bunita cu e ta.
Pa luna di october, luna di dia di bestia, nos a scoge e bubinan gracioso aki cu ta dorna, entre otro, Surfside Beach. Na ingles nan ta yama nan “laughing gulls”.
Siguientemente nos ta bay Santa Cruz na unda nos por aprecia un ruina di un cas tipico di cunucu y pa termina e aña cu e cielo di un mahestuoso atardecer.
New India a laga Pro-Graphics imprimi 10mil ehemplar y cada persona ta keda cordialmente invita pa pasa busca su copia gratuitamente na oficinanan di New India Assurance na J.E. Irausquin Boulevard No. 14, banda di Camara di Comercio. Por pasa tambe na bo broker preferi.
E empresa ta haci uzo di e oportunidad aki di extende su mas sincero deseonan pa un celebracion di Pasco yena cu paz, amor y bendicion y tambe ta desea un y tur un 2019 exitoso.