Despues di un tempo sinta na mesa sindicato STA y New India Assurance ta yega un bon contracto colectivo pa cual Diego de Cuba, presidente di e sindicato ta splica.
E contracto colectivo aki lo bay tin un duracion di 3 aña. Pa e tres añanan cu a pasa, cu tur e informacionnan cu nan a haya di e shopstewardnan, el a cana bon y pa e motibo aki tambe a bisa cu ta contento cu esey tambe y awor aki ta yega na e fase caminda cu tin cu bay firma un contracto colectivo nobo cu un duracion di tres aña atrobe. E ingredientenan cu e contracto colectivo aki tin den dje ta hopi bon y ta e manera eynan cu sindicato STA conhuntamente cu e companianan cu ta representa, por duna nan aporte tambe na e trahadonan di Aruba. Pasobra cerando Contracto Colectivo, tin e reglanan di wega poni den un documento. Y esaki ta hopi importante pasobra e ora eynan e compania tin di mantene su mes na locual cu e tin di cumpli cun’e y logicamente e trahadonan tambe tin cu cumpli cu nan debernan di cada dia.
Pa loke ta e contenido mes di e contracto colectivo aki, tin un bon ingrediente pa ta uno. Si mira, e ta bin bek cu un bon bonus di fin di aña, 13de maand, cu ta encera un vakantieuitkering di un luna. Por bisa cu ta ingredientenan cu pa STA ta un plus masha grandi mes pasobra tur hende sa cu hendenan aki bay cu vakantie, hopi compania na Aruba no tin esey y bonus di fin di aña hopi compania tampoco no tin’e. Ta dos ingrediente hopi importante pa un contracto colectivo.
Aparte di esaki tambe, trahadonan lo conoce aumento dependiendo di nan evaluacion. Kiermen si nan perform bon, nan lo conoce aumento debidamente, kedando na discrecion di gerencia y tambe ta un punto hopi importante pasobra berdaderamente ta mira hendenan cu ta haci mas esfuerso den trabao cu nan ta bay un paso mas dilanti. E hendenan aki ta prefera di duna nan un tiki mas cu esnan cu ta perform menos bon.
Basa riba esey tambe e trahadonan lo conoce aumento. Aparte di esey tambe tin dianan liber cu pago, dependiendo di kico e ta. E contracto colectivo ta uno hopi bon balansa, y ta spera cu pa tres aña paz laboral por reina den New India, manera el a reina den e ultimo tres añanan.