TEL AVIV, Israel- Prome Minister Israeli a gradici Merca pa a vota contra di e resolucion adopta door di ONU, cu un biaha mas ta exigi e fin di e ocupacion di Altonan di Golan door di Israel.
Prome Minister Israeli, Benjamin Netanyahu, a gradici Merca pa su voto contra di e resolucion di ONU cu un biaha mas ta exigi e pais Hebreu pa bandona e teritorio di Altonan di Golan. Pa prome biaha Merca ta vota contra, ya cu durante varios aña el a abstene di vota.
Diasabra ultimo, Netanyahu a califica e decision di e pais Norteamericano di “importante y husto” y a destaca cu e ta coincidi cu e politica di Israel pa cu esaki. “Israel semper lo keda den e Altonan di Golan y Altonan di Golan semper lo permanece den nos man”, el a declara, cita pa The Jerusalem Post.
Di otro banda, e lider di e partido centrista, Yesh Atid y ex minister di Finanzas, Yair Lapid, a cosidera cu e voto di Merca ta “un paso mas den direccion corecto” y el a afirma cu e Altonan di Golan semper lo sigui forma parti di estado di Israel”.
Na vispera di e decision, embahadora di Merca na ONU, Nikki Haley, a recorda cu Merca no tabata van plan di abstene su mes den un votacion anual inutil. “Si un dia e resolucion aki tabata ‘make sense’, awe sigur cu no”, el a subraya.
Cu 151 voto na fabor di abandono di e teritorio di parti di Israel, dos voto contra (Merca y Israel) y 14 abstencion, e resolucion titula “Ocupacion di Altonan di Golan Sirio” a wordo adopta na ONU diabierna ultimo. E documento ta exigi pa Israel pone un fin na e ocupacion di e teritorio y “stop di impone ciudadania Israeli y carchinan di identidad Israeli na ciudadanonan Sirio de e teritorionan di ocupa di Golan”.
E Altonan di Golan ta extende entre Israel, Libano, Siria y Jordania. Cerca di 70% di e teranan aki, mas o menos 1200 km² ta pertenece na Siria. Israel a anexa esaki forsosamente sin apoyo internacional na 1981, despues di a ocupanan den cuadro di e Guera di Seis Dia na 1967, unda cu Israel a tuma control tambe di Cisjordania y e Gaza Strip.
E comunidad internacional nunca a reconoce tal anexion y a cataloga esaki como un violacion di derecho internacional. E Conseho di Siguridad di ONU ta considera e Altonan di Golan como un “teritorio ocupa” door di Israel.