Internacional: E presidente di El Salvador, Nayib Bukele, a papia diamars den pleno di Asamblea General di Naciones Unidas (ONU) na Nueva York, unda el a resalta e accionnan di su gobierno riba e tereno di siguridad.
Bukele a sigura cu, bou di su mandato, El Salvador “a pasa literalmente di ta e pais mas peligroso na mundo pa ta e mas sigur di America Latina”. Den e sentido aki, el a agrega cu “nos ta un referente di siguridad y ningun hende por bisa lo contrario: e resultadonan ta aki”.
Na Mei ultimo, Gobierno a informa cu nan a logra marca di 365 dia (no consecutivo) sin homicidionan. E periodo aki a wordo conta for di cu Bukele a asumi e presidencia dia 1 di juni 2019.
Sinembargo, e cifranan tocante homicidio no por wordo verifica independientemente cu otro institucionnan, pasobra gobierno di El Salvador a pone nan bao di reserva argumentando cu divulga mas detayenan ta pone en riesgo seguridad nacional.
Bukele a bisa cu e cambionan implementa pa su gobierno pa para insiguridad den pais a wordo ataca sistematicamente door di “cierto paisnan, medio di comunicacion, y algun experto”.
Mas despues, el a agrega: “Si nos tabata laga e fiscal anterior keda, si nos tabata laga e hueznan di e sala anterior, y e hueznan, nos ainda lo tabata e capital mundial di asesinatonan”.
Den su intervencion awe na Nacion Uni, Bukele tambe a papia di su intencion pa “cambia” e fluho di salvadoreñonan cu ta bay pa otro paisnan.
“Nos sa cu ainda tin hopi caminda pa logra esey, pero nos ta riba caminda pa logra nos meta di cambia e fluho masivo di salvadoreñonan como resultado di tur e politicanan y guera civil cu tabata den pasado y yega na nos soño di tin migracion inverso, cu mas salvadoreñonan ta bolbe for di esnan cu ta bay”, el a afirma como mandatario.
