Den area di Punta Brabo, direccion Manchebo ta un area cu tin hopi cambio den e coriente di lama, vooral den e temporada di horcan, tin hopi cambio den e coriente cu por haya hopi “zandtransport’ ta tuma luga for di Bushiri pa Eagle, bay bin ariba e pida costa aki. Y e ta wordo yama pa Punta Brabo door di nos grandinan, door cu e ta hopi actividad.
Anteriormente tabata tin piedranan caba poni den lama, como un muraya pa proteha e hotelnan den e area y e piedranan aki tabata t’ey pa e ultimo 30 pa 35 añanan, cu nan ta tira eyden. Y manera cu e coriente ta bay, trece e santo, e ta wordo tapa. Y manera cu e ta aworaki, e ta bay cu santo hib’e otro caminda, e piedranan ta wordo exponi. Ora cu e caba di restaura su mes, e santo ta bin bek y tap’e. Esey ta e actividad cu tin aworaki. No tin niun piedra nobo poni den e lama. Esaki ta algo cu t’ey pa hopi aña y no ta haci niun daño na nos medio ambiente.
Manera ya menciona door di Sr. Marlon Croes, director di DOW, naturalesa a bay cu e santo, y e ta un beach hopi activo, cu e ta hiba e santo pa Eagle bin bek Bushiri. Y e ta trece bek manera ta conoci, pero no asina lihe cual ta pone cu mester bay evalua si ta pone santo den lama, e ora ta pone cierto ‘pocket’ di santo den cierto areanan strategico di lama, pa asina naturalesa sigui su curso.
Tur esaki lo sosode ora cu e temporada pasa, ya cu e tempo ta basta activo ainda. Na e depot di DOW nan tin un cantidad limita di santo blanco y esey nan ta bay hopi cauteloso cun’e, pa e no caba cu nan. E beach aki ta conoci pa ta crece y bay segun e coriente di lama, y no tin ningun compania aworaki cu ta dredge den e area aki. Esaki ta puur naturalesa cu ta haciendo trabao. Den pasado, por lo menos 30 aña pasa, piedra a wordo poni pa cuida e hotelnan aki.
Por ultimo, Sr. Marlon Croes a bisa cu despues cu nan a ripara cu tabata tin hopi deining parti paboa di Palm Beach, cu tabata tin hopi zeewier a subi tera, a pone e ekipo di DOW den marcha pa asina haci limpi. E periodo di actividad halto mesteer pasa pa asina bay haci un evaluacion pa wak kico por haci, cuanto santo mester di dje, pa asina landbased, drecha e pida tereno aki.