WILLEMSTAD/PHILIPSBURG —Limitá oumento di e gastunan di transakshon hasí ku tarheta di débito ta un di e puntonan di akshon prinsipal ku a sali for di e di dos reunion di National Payment Council (NPC). Awor ku e tarhetanan di débito a bira Mastercard i Visa, no ta tur transakshon hasí ku e tarhetanan akí na mashin di pago (terminal Point-of-Sale) i ATM ta ser prosesá komo transakshon lokal i esaki a hiba na un oumento den gastu di transakshon. Pa por garantisá un sistema di pago sigur i efisiente, ta esensial pa, riba korto plaso, tur mashin di pago i ATM ta konfigurá na un manera uniforme. Via e ret di pago tambe NPC lo traha pa limitá e gastunan di transakshon hasí ku tarheta di débito. Na inisio di 2025, NPC lo instalá un supkomishon ku lo studia e punto akí i bini ku rekomendashon.
Tabatin mas tema riba tereno di sistema di pago ku a bin padilanti na e reunionnan ku a tuma lugá na Sint Maarten i Kòrsou den desèmber, entre otro: froude ku sistema di pago, introdukshon di florin karibense i kon pa sigui desaroyá e posibilidatnan ku Instant Payments ta ofresé.
Froude ku sistema di pago ta birando mas frekuente i mas variá. Si ántes, froude tabata tuma lugá prinsipalmente ku tarheta di krédito, awendia, pago direkto, manera pago via lenk i kódigo QR di pago, ta eksponé e usuario na otro tipo di froude. E partisipantenan na e reunion di NPC tabata di akuerdo ku informashon ta un aspekto di gran importansia, spesialmente pa por mantené konfiansa di públiko den e opshonnan inovativo di pago. Riba inisiativa di CBCS, ta bai inventarisá kon e diferente organisashonnan por traha huntu riba un kampaña di informashon.
Por último, a trata e desaroyonan riba tereno di Instant Payments. Aktualmente, ta usando e teknologia akí pa prosesá pago instantáneo lokal. Pero Instant Payments tin mas posibel aplikashon, manera pago sin tarheta na tienda online, den establesimentu i asta internashonalmente entre e Paisnan i Boneiru, Aruba i Hulanda. NPC ta apoyá e desaroyonan akí i lo keda sigui nan djaserka.
NPC ta un plataforma riba kua e outoridatnan kompetente, CBCS i e otro partidonan interesá ta dialogá riba maneho di sistema di pago, ku un representashon balansá di interes públiko i privá. Membresia di NPC ta limitá na e outoridatnan kompetente i un grupo núkleo di instansia ku ta ser konsiderá relevante pa e kuestionnan spesífiko ku ta siendo tratá. Nan ta konsistí entre otro di representante di e suministradónan di servisio di pago, manera e asosiashonnan di bankero di Kòrsou i Sint Maarten i Curaçao Fintech Association, i e institutonan ku ta representá e usuarionan di servisio di pago di e dos Paisnan, manera entidat di gobièrnu, kompania di utilidat, konsumidó, i asosiashon di negoshi.
Tambe, NPC ta sirbi komo e lugá kaminda e suministradónan di servisio di pago (PSP) i usuarionan por ekspresá nan mes i interkambiá riba nan deseo- i retonan, i kisas transformá esakinan den funshonalidat nobo pa nos sistema di pago. E ophetivonan prinsipal di NPC ta: desaroyo di maneho, siguridat i efisiensia, inklushon finansiero, interoperabilidat, informashon i konsientisashon.
Willemstad, 29 di de