National Geographic ta un revista, website, canal di television, super bon conoci y tin mas cu un siglo cu ta dunando cobertura na temanan rond mundo. Hopi di nos studiantenan pa bin cu material scol, tabata coba sea na bibliotheek of den nan propio coleccion, storianan interesante cu potretnan mahestuosamente saca, cu ta duna realse. E biaha aki, nan a bin cu algo cu sigur lo enorguyece e Arubiano comun, door di traha un relato riba nos Shoco, nos parha nacional.
E foto periodista Pancras Dijk, cu ta traha pa e entidad pa loke ta e parti di Reino y Belgica, a haci un investigacion bastante amplio riba e parha.
Den su relato e ta skirbi cu e Arubianonan ta loco cu nan shoco. Su nomber cientifico ta Athene cunicularia arubensis y for di 2012 ta e simbolo nacional di nos pais. E parha ta ilustra riba stampia y tambe un moneda di conmemoracion.
E ta sigui splica den su relato cu riba e isla tin solamente 200 paar y debi na e turismo creciente, e area pa broei a wordo afecta gravemente pa no bisa completamente.
Tambe bestianan manera pushi, djaca y e boa, ta menasa e subespecie endemico aki.
E periodista a tene un combersacion cu Greg Peterson di Aruba Birdlife Conservation y a haya un splicacion amplio riba e habitat di e shoco. Hunto cu Parke nacional Arikok, e organisacion a desaroya un programa na beneficio di e shoco pa proteha y pa broei. Sigur esaki ta un super bon propaganda pa nos pais y specialmente pa nos Shoco. Pa mas informacion y tambe pa tira un bista riba nan website subi http://www.nationalgeographic.nl/