Nathan Fradl, Ava Hernandez, Jayzion Cornes, She-Cutie Hernandez, Samuel Rosales, Sara Chirino y Leonard Phillips a sali Best Fighter

Nathan Fradl, Ava Hernandez, Jayzion Cornes, She-Cutie Hernandez, Samuel Rosales, Sara Chirino y Leonard Phillips a sali Best Fighter den e campeonato nacional di Dia di Betico. Diasabra ultimo Aruba Taekwondo Bond ARTBO a organisa e prome campeonato nacional di e calendario di aña 2019 cu a tuma luga na Compleho Deportivo Frans Figaroa cu un total di 39 pelea. E peleanan a wordo categorisa den infantil, cadet, junior y adulto. Tur atleta di e 6 scolnan cu a participa a bringa contra di otro. Nathan Fradl di Impact Taekwondo kende tabata ausente pa motibo di lesion a bolbe bek manera un flecha. Nathan Fradl a topa cu Rasheed Lowe cu awo ta bou di Tiger Taekwondo Academy. Nathan Fradl no a mustra niun miedo y a cuminsa pone Rasheed Lowe bou di presion te cu den e di dos rond Rasheed Lowe no tabata por mas, pero a opta pa bay te cu e tercer rond y gasolin a caba. Nathan Fradl a prepara bon pa su contrincante y a lastra Rasheed Lowe y a pone cu e refereenan unanimamente a scoge Nathan Fradl como nan miho bringado den e categoria di Junior. Ava Hernandez, Jayzion Cornes, She-Cutie Hernandez, Samuel Rosales, Sara Chirino y Leonard Phillips ta bringadonan cu a demonstra un biaha mas cu nan ta e mihonan cu tin te cu awo den nan categoria y cu a haci cu nan a wordo escogi como miho bringado den nan categoria. ARTBO ta felicita tur e miho bringadonan pa nan empeño.

Comments

comments