Despues di algun luna cu Minister President Mike Eman a tuma over e responsabilidad di maneho di Sector Primario, director di Santa Rosa, Natalie Maduro ta expresa su satisfaccion cu e compromiso pa hiba industria local dilanti.
“Ami tin shete aña trahando cu Santa Rosa y bo ta wak hendenan cu a keda hopi aña sin planta, bin bek. Mi ta kere e conscientisacion y motivacion cu Santa Rosa a bin ta dunando y Gobierno, dus otro departamentonan cu ta trahando awo mas pega cu nos, ta mustra e compromiso cu Gobierno tin cu sector primario,” asina Maduro a bisa.
Prome Minister Mike Eman a sinta na varios ocasion cu Santa Rosa caminda e departamento tabatin oportunidad di indica nan deseo. Entre e deseonan aki, naturalmente ta inclui fondo y estudio cu ta permiti e departamento combina cu cifra y proyectonan ya caba pendiente. E mandatario a mustra di ta compronde y brinda tur su sosten.
Director di Santa Rosa ta splica cu e bishitanan cu Premier Eman ta haci na diferente cununcu y productor local, manera cu a sosode den fin di siman tras di lomba, ta permiti e haya un impresion completo di kico ta e tipo di productonan cu ta wordo produci.
Esaki acopla na e vision di Prome Minister Eman pa e industria sigui prospera y bira sostenibel, ta facilita e maneho pa den futuro por bisa cua ta e “productonan nobo cu nos por enfoca riba pa asina poco poco logra un diversificacion di productonan cu ta produci localmente pa nos hendenan por tin mas escohencia ora di haci compras”.