NEW YORK CITY, New York – Diaranson a realisa e di shete audiencia di huicio contra di Franqui Francisco Flores de Freitas y Efarin Campos, sobrinonan di e prome dama Cilia Flores, kendenan a wordo acusa di narcotrafico na Merca.
E periodistanan specialisa riba e fuente, a informa cu fiscalia a presenta un audio nobo caminda cu Flores de Freitas tabata papia cu un narcotraficante na Honduras y ta sigura cu e y su primo tabata controla Aeropuerto Internacional Simon Bolivar, miho conoci como Maiquetia, e principal termina aereo na Venezuela.
Den e audio tambe por a scucha ora cu e sobrino di e Prome Dama a confesa na e narcotraficante cu nan por uza rampa 4, e hangar presidencial pa mobilisa e droga for di Venezuela.
E confesionnan aki Flores Freitas ta realisa na un homber identifica como “El Sentado,” kende a sirbi di testigo pa Administracion pa Control di Droga (DEA).
E sobrino di e Prome Dama, tambe a afirma cu e diputado di e Asamblea Nacional, Diosdado Cabello, ta e homber cu ta controla e Forsanan Arma y ta recalca cu e tin incluso mas poder cu e Presidente di Republica, Nicolas Maduro.
Diahuebs, e abogadonan defensor y Fiscalia lo tene un reunion cu e miembronan di hurado y despues lo cuminsa cu e prome deliberacionnan di e caso. E delitonan cu a impone riba e narcosobrinonan ta amerita cu e sentencia ta wordo declara pa unanimidad. E Maximo pena cu nan por ricibi pa nan delitonan ta cadena perpetua.
E primonan Efrain Antonio Campo Flores, di 30 aña di edad y Franqui Francisco Flores de Freitas, di 31 aña di edad, a wordo acusa di a consipra pa trafica y distribui 800 kilo di cocaina pa Merca.
Nan a wordo deteni na Haiti na November di aña pasa pa DEA, e agencia antidroga Mericano y traslada pa New York, caminda cu nan a keda casi un aña den prizon.
Fuente: NTN24