Riba medionan social por a tuma nota cu Nannelle Croes, a anuncia cu ya e no ta directora mas di Funari. Aki ta sigui un relato cu el a publica riba su pagina riba Facebook.
“Despues di casi 3 aña di a traha cu hopi entusiasmo y dedicacion na Funari, mi a tuma desicion pa bay en buska di mi soño y tuma oportunidadnan nobo cu a presenta riba mi caminda. E paso di por tin mi mesun compania y alabes pa por pasa mas tempo cualitativo cu mi famia.
Mi kier a gradici cada un persona cu a forma parti di mi carera y di mi bida den e ultimo añanan aki, cuminsando cu clientenan di Funari, boso perseverancia, pasion den bida y gana pa bay dilanti, apesar di boso limitacionan fisico y obstaculonan cu boso ta encontra cune den boso bida diario, semper tabata un inspiracion pami pa ta un miho persona y boso semper lo keda hunto cumi.
Tur personanan cu mi a traha cune, Ministerio di Labor y Asuntonan social y henter su team, bestuur, coleganan, boluntarionan, studiantenan y stagiaires. Danki pa e momentonan cu mi a comparti cu boso, tanto momentonan di alegria y tambe di tristesa. Esakinan lo ta recuerdonan cu semper lo ta graba den mi curason. Mi a siña tambe masha hopi di cada un di bosonan y di e experiencianan cu nos a pasa.
Danki tambe na tur e fundacio, instancia y scolnan cu mi por a traha hunto cu nan y tur e proyectonan cu nos por a haci hunto.
Danki tambe na tur e companianan, service clubs, fundacion y personanan cu a kere den e trabou cu nos ta haci na Funari, na tur esunnan cu mi a traha hunto cu nan pero tambe tur esunnan cu a duna nan contribucion financiero y tambe den material. Esaki ta mustra cu tin hopi hende cu si ta care! Hopi nomber pa menciona, pero boso sa ken boso ta.
Sin lubida tur e miembronan di prensa y comunicacion, television, radionan, corantnan y tambe banda, artistinan. Boso support ta the best, semper boso tabata tey ora cu mi tabata ta mester di boso!
Pa finalisa, mi pareha, mi yuinan cu tur nan pasenshi, mi famia y friendsnan cu tabata semper e biggest support pa mi sali bay dilanti.
I’m ready for the next challenge! Thank you all for being one of a kind, be blessed!”