E Atleta di Volleyball Nakisha Winklaar, hunto cu su Mayornan, despues di a dedica un periodo largo di preparacion pa por a continua su estudio na Estados Unidos, ta weita un di su soñonan wordo realisa esta pa sigui studia y forma parti di un Team Internacional di Volleyball.
Aruba Volleyball Association ta sumamente contento cu e noticia aki cu e Atleta Nakisha Winklaar a ricibi un Scholarship na USA pa continua no solamente cu su estudio pero tambe pa sigui desaroya y profesionalisa su mes den su deporte di volleyball.
Den e mundo di volleyball aki na Aruba, Nakisha Winklaar ta conoci como e Atleta cu e dedenan magico . Na un edad hoben Nakisha Winklaar a cuminsa practica e deporte di volleyball y ya for di comienso di su trainingnan Nakisha tawata resalta como un Setter di Volleyball. Den mundo deportivo y muy specialmente den e deporte di volleyball, un Setter tin un rol masha importante y Nakisha Winklaar a nace cu e Don di ta un colocadora/armado den e wega di volleyball. Nakisha a resalta na Weganan Escolar di Volleyball, na Olimpiada Escolar, cu Seleccion di Scol unda Nakisha a participa na e Weganan di Volleyball Interinsular y hopi jong el a cuminsa train volleyball organisa cu e Team di Savaneta La Fama y ultimo añanan el a hunga cu e Team di Damas di POVA.