Nada di reconteo of fraude pero eror grandi ora a traha lista di AVP

AVP for di momento cu resultado di eleccion tabata un hecho, a cuminsa busca otro pa culpa pa un derota cu nan no a spera di lo a sufri pero pueblo a vota bon cla den eleccion 2021 y AVP tin cu biba cu e resultado.

Ora cu analisa resultado di eleccion, e expectativa cu tabata cu entre otro lider Mike Eman a carga, por compronde e desilusion pero lo ta na su luga pa busca e sorpresa grandi aki den propio seno.

Aki tin cu cuminsa cu formacion di lista, caminda na luga di opta pa laga Benny Sevinger for di lista, mirando cu e ta parti di un investigacion penal andando, a pone tog riba lista y cu Benny a saca su mes cu voto personal, ta berdad tambe cu el a perde mas cu mil sostenedo.

Mike Eman na luga di mira den direccion di e comision encarga cu eleccion, e analisa e lista cu el a presenta, un lista cu el a yama uno bon hinca den otro pero cu realidad a bira un lista perdedo.

A schuif hinca candidatonan den e prome 10 riba e lista pero kendenan no tabatin experencia politico y e resultado di votonan personal, a mustra cu pueblo no conoce nan capacidad ainda caminda a spera mucho mas for di e nobonan riba lista.

E eror mas grandi di lider Mike Eman, tabata di no honra e cabay di partido AVP di ultimo añanan cu ta Marlon Sneek, kende a bin haya number 10 riba listra mientras cu pa e trabou cu Marlon a haci, el a merece di ta entre e prome 7 candidatonan riba e lista.

E cantidad di voto personal cu Marlon a logra  ta mustra cu hopi simpatisante di e politico aki, no tabata contento cu e puesto cu Sneek a haya riba lista. Pa colmo door di e lista traha malo cu no a cay na agrado di simpatisantenan berde mes, a causa cu Sneek lo no ta den e fraccion nobo di AVP. Hustamente e persona cu a sali afo pa ataca gobierno. E unico cu practicamente tur siman tabata den noticia y prensa despues di e eleccion di 2017. Net net Sneek no a logra cumpli cu su periodo completo pa haya e volle pensioen. Un tristesa grandi pa un persona cu a haci asina hopi pa e partido  berde, pero pa capricho y terkedad di e lider di partido awo ta keda afo.

Otro decepcion cu a bin despues di eleccion tabata ora cu a bira conoci cu Benny Sevinger siendo deteni na KIA, a haya suficiente voto pa e haya un puesto den Parlamento loke a pone cu Robert Candelaria lo no por ta den Parlamento pa aworaki.

Esaki lo por cambia na momento cu e caso di Benny bay dilanti Hues y e wordo haya culpable loke ta pone cu e lo tin cu retira como miembro di Parlamento  cu e ora lo habri caminda bek pa Candelaria drenta Parlamento.

 

Awor tambe tin por ehempel e caso di e hoben politico Cicilia kende a haya acogida grandi logrando casi 500 voto personal cu ta un cantidad dobel di loke Rycond Santos do Nascimento a logra cu su 214 voto y cu ta permiti’e drenta Parlamento.

AVP tin cu busca e problema no den reconteo di voto pero den e fracaso di  Rycond, e rol di Selene Kock   cu a logra solamento 385 voto, Sharon Erasmus cu solamente a saca 59 voto, Juan Kelly candidato di Noord cu solamente 57 voto caminda por mira cu Mike Eman como lider di partido a faya den trahamento di su lista.Lamentablemente e hoben Cicilia awo a keda for di Parlamento.

No ta un asunto di reconteo of di fraude pero Mike Eman tin cu analisa e lista cu a wordo traha y mira con eynan e fayo grandi a sinta  y e daño cu e insistencia di bay  cu Benny Sevinger riba lista a causa, anto Mike Eman y AVP no mester busca ningun otro caminda pero carga e peso di e fayo grandi aki di e lider.

Comments

comments