Kenroy Roach, e Consehero Regional pa e Oficina Regional di Latinoamerica y Caribe di Nacionnan Uni su Development Programme a lidera e mision di un siman cu recientemente a sostene na Aruba pa traha riba e ‘roadmap’ di implementacion di e Metanan di Desaroyo Sostenibel (SDG). Na final di e siman di trabou intensivo, Roach a comparti su conclusionan indicando cu ta e ‘ta positivamente impresiona cu e cantidad di trabou cu ta wordo haci na Aruba pa cu e SDGnan’ bisando acerca cu ‘Aruba ta un di e promenan den Caribe pa cuminsa y nos a wak hopi bon trabou riba infrastructura, energia y turismo.’
E mision cu a sostene reunionnan di trabou cu diferente sector di nos comunidad tambe a identifica cua ta e retonan cu ainda nos isla tin su dilanti. E agenda di SDG ta uno hopi amplio cu 17 meta y 179 obhetivo. ‘Nos conclusion ta cu, aunke tin hopi progreso, ainda tin hopi buraco. E sistema di Nacionnan Uni lo traha pa sostene Aruba. E resultado principal di e mision di e siman aki ta e creacion di un “SDG Implementation Roadmap” cu ta delinea loke nos ta yama “key accelerators” y algun di e nan ta rond di educacion.
Roach a duna como ehempel cu ta bay traha pa brinda e sistema di educacion e hermentnan necesario pa produci personanan cu por yena e cuponan di trabou di futuro y tambe amplia e curriculum pa asina ora cu hendenan caba nan estudio no mester wak den direccion di Gobierno pa un trabou, pero por pensa pa ta doño di nan mesun compania y relaciona esey cu innovacion, ciencia y tecnologia. Tambe ta hopi importante e tema di brinda mas acceso na hende muhe y mucha muhenan na e terenonan aki.
Tin retonan tambe riba medio ambiente, pa proteha e ecosistema marino pasobra e ta asina mara na turismo, pero en general tin bon elementonan cu a keda desaroya durante e siman di trabou y inclui den e SDG Roadmap.
‘Nos ta hopi complaci tambe cu e nivel di participacioon. Boso tin un sector priva hopi fuerte y un sociedad civil hopi fuerte cu ta contribui na e proceso aki. Si tur cos bay bon pa e sociedadnan den futuro y e sociedad traha riba e prioridadnan aki, ta bay contribui na un Aruba mas sostenibel y mas berde,’ segun e ehecutivo di Nacionnan Uni. E siguiente stap pa nan ta pa oficialisa e documento, implementa e conclusionnan na Aruba y sigura cu e structura ta na su luga pa cuminsa planea, ehecuta y monitorea e avance.