NEW YORK CITY, New York – Nacionnan Uni a bisa diaranson cu pa awo solamente el a ricibi rond di 40% di 120 miyon di dollar den fondo di emergencia cu a solicita pa apoya Haiti tras di e paso di horcan Matthew.
Mas di un luna despues di e catastroge, e organisacion ta hayando dificultad pa haya recurso, segun John Ging, director di operacionnan di Oficina di Coordinacion di Asuntonan Humanitario di Nacionnan Uni, a admiti den un conferencia di prensa.
Ging a mustra sorprendi pa e poco apoyo di e donantenan pa Haiti y a bisa cu e respuesta ricibi te awor aki ta claramente abao di lo habitual pa loke ta desasternan natural di e tipo aki.
“Habitualmente nos ta ricibi rond di un 60% (di e fondonan di emergencia) den e prome luna,” e responsabel di OCHA a apunta, kende a recorda cu e solicitud den e caso di Haiti tabata ya modesto.
Pa esey, el a haci un yamamento na e donantenan pa nan participa y yuda na evita “hopi sufrimento inecesario.”
Ging, di buelta na New York tras di bishita Haiti, a recorda cu hopi hende a perde tur cos cu paso di e horcan, den un pais cu ya a sufri di probresa extremo y hopi otro problema.
Segun Nacionnan Uni, e desaster a afecta directamente 1.4 miyon di perosna, a laga por lo menos 800 mil persona den necesidad di ayudo alimentario y a provoca desplasamento di 175 mil.
Ging a destaca cu e despliege efectua pa e agencianan humanitario den e prevision di e horcan, a yuda hopi na ora di hiba asistencia di forma rapido pa e poblacion, pero a reconoce cu e dañonan cu e infrastructuranan a experimenta den cierto zonanan a dificulta e acceso na algun comunidad.
Tras e horcan, un di e riesgonan grandi pa Nacionnan Uni tabata e propagacion di colera, por loke a pone en marcha un campaña di vacunacion pa 800 mil persona cu a desaroya cu exito, el a aña.
Ademas di Haiti, Ging a bishita recientemente Sur sudan, un pais cu e ta referi como “esun di mas peligroso di mundo pa trahadonan humanitario.”
Segun el a corda, 67 di nan a wordo asesina mientras cu nan tabata traha eynan desde final di 2013 y te cu e dia di awe, ta sigui den obstaculonan continuo pa opera.
Fuente: NTN24