Diasabra 30 september pa 7:30 di anochi a start e wega pa di 3er luga di 40+ entre Nacional y Bubali. Aki Nacional ta pone hopi presion riba Bubali, pero no por hinca gol. Di otro banda Bubali ta hunga riba contra y ta uza su delanteronan y a haya varios chens asina. Ambos ekipo a cera nan defensa hopi bon y ta duna asina nan medio campo hopi trabou pa domina e bala y crea atake. E wega ta caba na empate 0-0 y man’e ta skirbi den reglamento ta bay direct over na tira penalty. Mester bisa cu e keeper di Nacional Jorge Luminier a haci un tremendo trabou bou di lata ora di penalty y ta zorg pa Nacional gana 3-1.
Mes ora ta start pa ongeveer 10or e final di 40+ cu ta bay entre e number 1 di standing Dakota Starzz y e number 6 di standing Caravel cu a lucha duro pa yega final. Pa 10or ta presenta team completo hunto cu e refereenan na fanaticada y ta haci apertura di e final cu e himno di Aruba. Ta saca potret oficial y ta tira lot, despues ta presenta e 11 starters di cada team y ta start cu e final di 40+. Dakota ta sali bon riba Caravel y tin un leve dominio riba nan. Wega ta riba un speed halto y tur bala ta wordo bringa, referee mester a core hopi pa ta riba cada hugada y asina domina e partido. Ambos team a crea nan oportunidad pa gol pero defensa y keeper a traha duro pa e wega caba halftime 0-0. Den sosiego di halftime organisado Hooiberg Vets ta haci e famoso Shoot-out y na unda Felix Juni Perez di Bubali ta gana entre otro su caha di Chill. halftime ta cunsa mescos, riba un speed halto y bringando tur hugada. Faltando 20 minuut pa wega caba Caravel ta haya un tiro liber net pafo di doelgebied. Aki e Milton Badilla ta tira direct riba gol, pero keeper Lorenzo “bibi” Loopstok ta saca e bala di gran forma pero e rebote ta cay dilanti gol y aki Toti Penaranda ta hinca pia y ta schuif e bala den gol y ta haci e wega 1-0 pa Caravel. Dakota ta saca tur cu tin pa empata e wega y falta e toke final pa logra esaki, asina Caravel ta wanta e ultimo 20 minuut nan y wega ta caba 1-0 pa Caravel. Caravel asina ta titula campeon di 40+ FEDEVETA 2017.
Despues di e final di 40+, ongeveer pa 11or ta bay over na entrega di trofeo. Bubali ta haya trofeo pa di 4er luga, Nacional ta haya pa di 3er luga. Dakota starzz ta haya su trofeo di sub-campeon 40+. Goalgetter di 40+ ta bira John Villareal di Caravel y Sandro Osorio Silva di Teachers, ambos cu 11 gol den campeonato regular. MVP di 40+ ta bira e keeper di Caravel Andy de Cuba, cu a haci un tremendo trabou e anochi aki. Campeon ta bira Caravel cu a lucha duro pa yega final y tambe ta taha duro e ultimo wega y ta bira Campeon 40+ FEDEVETA 2017.
Di parti FEDEVETA pabien na e Campeon Caravel y sub-campeon Dakota Starzz, tambe na Nacional y Bubali cu nan 3er y 4to luga. Danki na e organisado di play-off, semi-final y final di 40+ Hooiberg Vets cu a haci un bunita trabou, Nan a zorg pa veld di Caiquetio ta full yena di fanatico y ambiente durante 3 diasabra, tambe e bar y Cushina bon surti cu sigur ta atrae e fanaticonan. Danki ta bay na e team completo di referee dirigi pa Head referee Ernst mohamed y tambe na tur fanaticada cu a bin den gran cantidad y apoya nos talentonan di futbol den 40+