REINO UNI – E nacimento di e prome baby di mundo engendra mediante un tecnica di reproduccion asisti cu ta emplea ADN di tres mayor diferente, a bira un realidad, segun e revista di divulgacion cientifico Britanico “New Scientist”, a revela diamars.
E publicacion a señala cu ta trata di Abrahim Hassan, un baby di cinco una, cu a naci fruta di un controvertido metodo cu ta sirbi ADN di e tata, di e mama y di un donante of “di dos mama.”
E tecnica aki, cu ta permiti na progenitornan cu mutacionnan genetico straño concebi yiunan sano, a wordo aproba na Reino Uni na 2015.
Expertonan den embriologia ta splica cu e nacimento di Abrahim Hassan, cual mayornan Jordano a wordo trata na Mexico pa un ekipo medico di Merca, mester a impulsa e progreso di e tecnicanan aki rond mundo.
Den e caso aki, e mama di e baby, Ibtisam Shaban, tabata tin gennan yama sindrome di Leigh, un desorden mortal cu ta afecta e sistema nervioso den desaroyo.
E gennan di e enfermedad aki ta wordo haya den e ADN mitocondrial, cu ta proporciona e nergia di e celulanan y ta transporta 37 gen cu ta wordo transmiti di mama pa yiu.
Segun e articulo di “New Scientist”, rond di un cuarto di ADN mitocondrial cu Shaban tin, tabata tin e mutacion cu a ocasiona e enfermedad cita.
Aunke e mama di Abrahim ta un persona sano, e sindrome a ocasiona morto di su dos prome babynan, pa loke, hunto cu su casa, Mahmoud Hassan, a solicita e ayudo di e specialista den fertlidad John Zhang y su ekipo den e Centro di Fertilisacion New Hope na New York.
Den teoria ta existi vrios manera di ehecuta e tecnica aki di combina ADN di tres mayor, pero e metodo aproba na Reino Uni, denomina transferencia pronuclear, implica e fertilisacion di e ovula di e mama, esun di un donante y e sperma di e tata.
Pa e tecnica aki, prome cu e ovulonan fertilisa a cuminsa na dividi den embrion, ta retira cada nucleo y a continuacion, ta descarta esun di e donante pa reemplasa pa esun di e mama.
No obstante, e tecnica aki no a resulta apropia den e caso di Shaban y Hassan, ambos musulman, pa motibonan religioso, pues nan a opone na e destruccion di dos embrion.
Pesey, Zhang a adopta un enfoke diferente na su tratamento, pa cual el a retira e nucleo di un di e ovulonan di Shaban y a inserta den e ovulo di e donante, di cual a wordo retira di su propio nucleo.
Di e manera aki a crea cinco embrion, di cual solamente uno a desaroya normalmente y di dje a nace baby Ibrahim.
Segun e revista ta anuncia, e ekipo medico lo papia otro luna di su hayasgonan den un congreso cientifico riba medicina reproductiva na Salt Lake, Merca, un pais caminda e metodonan no a wordo aproba legalmente.
Fuente: NTN24