Un avion di pasahero 737-800 di e aerolinea di costo abao FlySafair, a perde diadomingo un taira durante lantamento di vuelo di e aeropuerto internacional O.R. Tambo di Johannesburg (Zuid Africa), segun por a aprecia riba imagen comparti riba red social y tambe segun e medionan social.
“Aparentemente e avion, cu destino pa Cape Town, a sufri daño na un di su tairanan patras durante lantamento di vuelo. E personal riba tera di (e aeropuerto) O.R. Tambo, a detect’e y a avisa e tripulacion. A tuma e decision di bolbe Johannesburg,” e Compania di Aeropuerto di Zuid Africa (ACSA), a splica den un comunicado.
Tambe, a sigura cu, a pesar di e fayo tecnico, e avion cu a opera vuelo FA212, a realisa e aterisahe di emergencia sin problema adicional n’e aeropuerto di Johannesburg y no a registra herido.
“Nos lo kier a elogia e pilotonan y e tripulacion di FlySafair pa nan profesionalidad den e maneho di e emergencia aki. Nan formacion y experiencia a garantisa cu tur pasahero abordo di e avion a sali ileso,” e director general regional di ACSA, jabutani Khambule, a declara.