Coleganan di Servicio Veterinario (Veterinaire Dienst) a ricibi e noticia inespera y hopi tristo cu nan colega hopi aprecia Edward Banfield a fayece riba 5 di januari, 2017. Edward, cariñosamente yama Eddy, a fayece inesperadamente un rato despues di a yega cas for di su trabou.
Eddy a nace riba 13 di november 1958 y a drenta servicio na 1988 riba dierendag cu ta 4 di oktober 1988. Prome cu e la drenta servicio di gobierno oficialmente Eddy a cuminsa labora part time na Servicio Veterinario como un soyado di bestia y ayudante den shelter. Eddy semper a resalta den su trabou. Prome cu a fayece Eddy tabata ocupa e funcion di onderopzichter 1ste klasse.
.
Eddy tabata bon conoci den comunidad como un hungado di baseball sumamente talentoso cu amor pa e wega. Eddy a cuminsa hunga cu e ekipo di Heineken, despues cu Budweiser cu a bira Guiness Rangers y cu despues a bira Coca Cola Rangers. Eddy a hunga den e posicion di shortstop cu otro hungado famoso di baseball manera Alvin Albus (qepd), Jessy Beukeboom, Rock Angela y Wilfrido Thiel. Eddy tin e record pa mas cu 20 aña di mas homerun conecta den un campeonato cu ta 12 homerun RIBA veld grandi. Te na su fayecimento ainda Eddy ta mantene e record aki den veld grandi. Eddy tabata conoci como un shortstop briyante y tabata sumamente dedica y a hunga e deporte cu gran pasion.
Servicio Veterinario ta bisa ayo na un gran colega, semper alegre y cu sa deleita su coleganan cu su Calypso ora di celebracion. Eddy ta laga memoria masha bunita atras y su coleganan lo sinti su falta masha hopi mes.
Coleganan di Servicio Veterinario kier expresa nan profundo condolencia na casa, yiu y famia di Eddy y ta desea nan hopi forsa den e dianan hopi dificil aki.
Cu Eddy sosega na paz.