Procurador- General, mr. Alexander van Dam, pa medio di un comunicado ta informa pueblo di e ultimo desaroyo den caso asesinato di e damita Sarahi Sierra, caminda e ta expresa su alegria, den un forma bisa, informando e pueblo di Aruba cu diaranson atardi, e homber J.A.C. a keda deteni riba sospecho di envolvimento den fayecimento di Sarahi Sierra. Pero, mr. Van Dam ta sigui bisa, na mes momento e ta realisa su mes tambe e tristeza y dolor cu e drama teribel aki ta nifica pa famia y amigonan di Sarahi.
J.A.C. ta un homber Arubiano di 46 aña y ta un conoci di famia di e victima, cual ta haci e situacion aki mas doloroso ainda pa famia di Sarahi. Den e ultimo tres lunanan, Cuerpo Policial di Aruba a investiga e caso intensivamente bao guia di un fiscal di husticia. No por keda sin menciona tambe BFTO (Bureau di Investigacion Forensico y Tecnico) di Cuerpo Policial di Aruba, cu a haci un trabao sublime.
Desde inicio di e investigacion diferente testigo a menciona varios nomber di personanan cu posiblemente ta envolvi den e hecho castigable aki. J.A.C. tabata un di e personanan cu a wordo menciona. Dor di e cantidad di persona cu a wordo menciona, mester a haci investigacion cuidadoso y amplio pa por determina si e hendenan aki ta envolvi of no. Den un investigacion tin cu evita na tur momento pa focus demasiado riba un solo angulo y normalmente e tipo di casonan aki ta exigi investigacion largo y intensivo. Pesey e investigacion a wordo cuminza y hiba na un manera amplio.
Banda di esey tabata duidelijk desde inicio di e investigacion cu ta bay ta particularmente e parti di investigacion forensico cu lo duna claridad tocante e posible autor of autornan di e crimen. En espera pa e resultado di investigacion forensico, recherche a sigui investiga e personanan menciona pa testigonan.
E material di investigacion a wordo investiga pa NFI (Instituto Forensico di Hulanda), cu kendenan nos ta traha hunto semper. Cuerpo Policial a logra exclui hopi di e personan aki, como posible autor di e crimen a base di trabao di investigacion.
Finalmente e resultadonan di e investigacion forensico a sali na cla ayera.
E resultadonan en combinacion cu e resultadonan di e investigacion tactico di recherche di e TGO (Team Grootschalige Opsporing) cu Cuerpo Policial di Aruba a haci e ultimo tres lunanan, a hiba finalmente pa e sospecho contra J.A.C. y na su detencion tambe ayera. E investigacion lo dirigi su mes di awor pa dilanti principalmente riba e sospechoso aki.
Por ultimo, mr. Alexander Van Dam a expresa cu e ta spera cu pueblo ta compronde cu na interes di e investigacion no por duna mas detaye tocante e causa di morto, ni tampoco tocante e circumstancianan bao di cual e victima a wordo haya.
“Mi pensamentonan ta cu e victima, y su famia y amistadnan”, procurador – general, mr. Alexander Van Dam a finaliza bisando.