Un masacre nobo a tuma luga na Ecuador, caminda cu shete persona a wordo asesina na tiro, diadomingo, 9 di juni den e oranan di atardi den e provincia di Los Rios. E crimennan a wordo cometi mientras cu e victimanan tabata mirando un partido di futbol den e restaurant Ventanas. Den e zona un estado di excepcion ta vigente dicta pa presidente Daniel Noboa.
E medionan local a detaya cu, despues di e atake, cinco di e victimanan a muri riba e cancha, mientras cu e dos restantenan a sufri herida y a wordo hospitalisa, pero finalmente nan tambe a perde nan bida. E asesinatonan a wordo cometi pa por lo menos cinco individuo cu tabata mobilisa riba brommer.
Despues di e tiramento, e demas personanan cu tabata presente, a huy den e casnan di e zona, e medionan local a detaya.
E matansa aki a wordo cometi e dia siguiente di e crimen di Mauricio Vasconez, kende tabata un candidato n’e Asamblea Nacional di Ecuador y tira mata mientras cu e tabata circula cu su auto na Quevedo, tambe pronvicia di Los Rios.
E asesinato a wordo cometi pa homber riba brommer c a acerca su vehiculo y a tir’e, provocando morto di e politico, mientras cu su casa a sufri herida y mester a wordo hospitalisa.
Provincia di Los Rios ta un di e shete den cual ta goberna e estado di excepcion decreta pa presidente Noboa dia 22 di mei. E medida tin un vigencia di 60 dia.
“E gobierno nacional a identifica cu e gruponan narcoterorista a sconde y a concentra nan accionnan criminal principalmente den e zonanan aki,” un comunicado di e presidencia a detaya.
