WILLEMSTAD – Entrante djamars 30 di yüli 2024 e tarifa di gasolin ta baha i e tarifa di diesel ta subi na Kòrsou. E tarifa di elektrisidat i awa ta baha for di djaweps 1 di ougùstùs 2024. Esaki Regulatory Authority of Curaçao (RAC) ta partisipá den su komunikado mensual riba e
partikularidat aki. RAC ta supervisá e desaroyo di preis di produktonan petrolero i di utilidat. Kálkulo tarifa produktonan kombustibel
E kálkulo di tarifa pa Mogas 95, Gasoil LSD, LPG 20 i LPG 100 konosé e komponentenan 1. Preis di kompra, 2. Impuesto di importashon LSD, 3. Garantia di suministro di kombustibel (1a), 4. Garantia di suministro di kombustibel (1b), 5. Márgen pa Curoil, 6. Impuesto di
konsumo (Akseins), 7. Sùrplùs/Défisit (Recovery), 8. Supsidio krusá, 9. O.B. di 6% pa benta por mayor, 10. Márgen pa agente, i 11. O.B. di 6% pa benta por detal. Pa sierto komponente e tarifa sero ta konta, sea temporalmente òf nò. E tarifa pa benta por mayor ta inkluí e promé
nuebe komponentenan miéntras ku e tarifa pa benta por detal (na usuario final) ta inkluí tur komponente.
Ta determiná e preis di kompra, kaminda kalkulashon ta kuminsá, mensualmente pa e luna siguiente a base di e reserva di kombustibel disponibel na final di luna pasá. Pues: e preisnan di kompra ku ta stipulá pa ougùstùs 2024, en prinsipio ta basá riba e reserva di kombustibel
disponibel pa final di yüni 2024. Den kaso ku si e informashon tokante di reserva duná dor di Curoil ta inalkansabel, lo tin ku sali for di e kotisashon internashonal resien. E preisnan di kompra akí ta wordu revisá dor di notashon di preis internashonal. Dor di e lapso aki den e mekanismo pa determiná preis, por ta nesesario pa deskontá eventual diferensia entre e preis di kompra regulá i e montantenan di kompra real, di forma retroaktivo via e elemento ‘Sùrplùs/Défisit’.
E tarifa usuario final pa Mogas 95 ta baha kompará ku e luna anterior, a konsekuensia di un bahada den e preis di kompra ku ta reflekshoná e desaroyo di preis internashonal i un komponente di surplus /défisit negativo. E tarifa usuario final di Gasoil (U)LSD ta subi debí na
un oumento den e preis di kompra ku ta den liña ku e desaroyo internashonal i e komponente di surplus/défisit positivo.
Kálkulo tarifa awa i koriente
E kálkulo di e tarifa pa awa i elektrisidat tin dos komponente: e tarifa básiko i e klousula di kombustibel. E klousula di kombustibel pa elektrisidat ta konsistí di dos elemento: kompra di koriente i gastunan di kombustibel.
E ‘kompra di koriente’ ta basá riba e preis pa e energia ku tersernan ta suministrá, manera energia di bientu i di solo. ‘Gastunan di kombustibel’ ta enserá produkshon di energia dor di Aqualectra mes. Tambe e klousula di kombustibel pa awa ta konsistí di dos elemento, ku ta
‘kompra’ basá riba preis di awa ku ta wòrdu suministrá dor di un terser partido i e gastunan di elektrisidat pa produkshon di awa dor di Aqualectra mes.
Sin embargo, kada luna e uso di e diferente medio pa produkshon – e asina yamá ‘meskla di produkshon’ ta varia. P’esei RAC ta determiná e balor di e klousula di kombustibel mensualmente basá riba e pronóstiko di Aqualectra, di kiko e meskla di produkshon lo bira, den e kaso aki pa e luna di ougùstùs 2024. Si un luna despues resultá ku e elemento akí tabata muchu haltu òf muchu abou, ta korigí esaki. Den e kaso akí, ta trata di e luna di yüni 2024.RAC ta determiná e tarifa básiko pa tantu awa komo elektrisidat un biaha pa aña. E tarifa akí ta enserá tur otro gastu (fiho) pa e produkshon di awa i elektrisidat i tambe e gastunan pa e distribushon i e entrega di esakinan, manera gastu di personal, di mantenshon, depresiashon, etc.
E bahada di e tarifanan pa elektrisidat prinsipalmente ta resultado di un uso mas haltu di BOOcentrale den e produkshon-miksto antisipá i un faktor di korekshon mas abou pa luna di yüni 2024. E bahada di tarifanan di awa ta resultado di un bahada den kostonan di elektrisidat pa
produkshon di awa i un faktor di korekshon mas abou pa luna di yüni 2024. E ahuste di e tarifanan pa elektrisidat tambe ta inkluí un oumento di e tarifa básiko di NAf 0,0125 pa kada grupo di tarifa. E oumento aki ta entre otro resultado di gastunan mas haltu i invershonnan hasí pa garantisá e stabilidat di e suministro di elektrisidat i fasilitá implementashon di mas energia duradero. Na mes momento tin transishon pa uso di kombustibel mas ekonómiko ku ta nifiká un kompensashon mas grandi ku e subida di tarifa básiko. E tarifa básiko di awa ta permanese sin kambio.
Aprobashon i fihamentu
RAC ta asesorá Konseho di Minister (KdM) enkuanto e tarifanan nobo. Solamente despues ku e KdM aprobá e propuesta, e Minister pa Desaroyo Ekonómiko, ku alabes ta enkargá ku asuntunan di energia, ta fiha e tarifanan. Eseinan ta e tarifanan máksimo ku por usa un luna largu. Ku e prosedura akí, ku ta konsiderá faktornan internashonal i lokal, e supervisor RAC ta vigilá e entrega di kombustibel, awa i elektrisidat na e poblashon lokal di forma independiente i transparente, pa esaki ta kontínuo i rasonabel. Por mira e ahustenan eksakto den e tarifanan riba www.rac.cw.
