Kontinuando ku e investigashon relashoná ku e kaso di asesinato ku a tuma lugá dia 9 di desèmber 2022, na dilanti di un trùk di pan riba F.D. Rooseveltweg, polis a hasi un detenshon mas.
Djárason 26 di aprel 2023, alrededor di 12.44’or di mèrdia Tim di Aresto a hasi detenshon di e hòmber sospechoso C.H.E.Z., di 24 aña di edat nasé na Kòrsou.
Den kompania di e C.H.E.Z., polis a hasi detenshon di un dama sospechoso C.A.M.A.P., di 21 aña di edat nasé na Kòrsou, relashoná ku violashon di lei di arma di kandela. Detenshon di e sospechosonan a tuma lugá den área di Mexicoweg.
Durante di e detenshon a haña i konfiská un arma di kandela ku munishon.
Despues di detenshon e Tim Divishon di Krímen Organisá a tene un entrada hudisial na kas di e C.H.E.Z., den Kaya Awaseru.
Na e kas a haña i konfiská artíkulonan di importansia pa e investigashon.
A presentá ámbos sospechoso dilanti un fiskal ouksiliar ku despues di interogashon a pone C.A.M.A.P., den libertat i a ordená enkarselamentu di C.H.E.Z., pendiente di mas investigashon.
Investigashon den e kaso aki ta sigui den “full swing” i no ta ekskluí ku lo bai tin mas detenshon.
