Un gang dedica na trafico di migrante a traves di Tapon del Darien, peligroso selva pantanoso n’e frontera entre Colombia y Panama, a wordo desmantela pa polis Colombiano hunto cu Interpol y den e operativo a detene nuebe persona, e medionan local a informa.
E integrantenan di e grupo delictivo a wordo aresta den diferente departamento Colombiano, despues di un investigacion cu a cuminsa aña pasa cu a permiti establece cu e gang a transporta por lo menos 294 persona p’e frontera zuid di Merca. Di nan, 54 a logra drenta teritorio Mericano.
Segun a determina, e migrantenan tabata bin di Cuba, Haiti, Venezuela, China, India, Pakistan, Afganistan y Somalia, entre otro pais. E personanan aki mester a paga entre 2 mil y 4500 dollar, dependiendo di su nacionalidad y ruta. Ta calcula cu e traficantenan, cu tabata realisa te cu cuater biahe semanal, recaudando mas di 3 miyon peso Colombiano (mas of menos 750 mil dollar).
E manera di actua di e gang criminal tabata implica cu ora e migrantenan tabata yega Colombia for di e fronteranan cu Brasil, Ecuador y Venezuela nan tabata hiba nan te cu Antioquia, for di caminda nan tabata sigui nan caminda rumbo Darien te yega Panama. Pa evita problema cu autoridad migratorio Colombiano den nan entrada di e pais, e Afganonan, e Haitianonan y e Pakistaninan tabata ricibi documentacion Chileno di parti di e traficantenan.
Entre esunnan deteni tabatin e lider di e grupo y e organisado di e movementonan di migrante, identifica como Carlos Alberto Coy Garcia, kende a wordo haya den e ciudad di Ipiales, departamento di Nariño, mientras cu e tabata subi 19 Venezolano den un bus.
Fuera di e detencionnan, autoridad a confisca 18 bienes y edificio, entre nan cuater negoshi, shete vehiculo y un sociedad simplifica y seis cupo di transporte special pa bus. Tur esaki ta suma un balor di 2.367 miyon peso (593 mil dollar).
Na final di november, e organisacion Medicos sin Fronteras (MSF) a adverti riba e “cifra sin precedente” di casi 500 mil persona cu a crusa el Tapon del Darien den e prome 11 lunanan di aña. E cantidad a supera largamente pa 248 mil persona di aña pasa.
MSF a afirma cu den e 100 kilometer di selva, e migrantenan ta exponi na situacion criminal manera atake, robo, secuestro y violencia sexual. Di acuerdo cu nan registro, e aña aki a atende 397 sobreviviente di violencia sexual na Panama – 107 na october -, incluyendo mucha. “Y ta probabel cu e cantidad aki ta subestima e problema, ya cu violencia sexual hopi biaha no ta denuncia debi n’e stigma y miedo,” e organisacion a adverti.