Den un wega dramatico Glovers ta gana Deco’s y pasa pa e final di e torneo Himno y Bandera organisa pa SV Aruba Juniors. Despues cu Deco’s tabata gana 3-0 pa 5 inning largo, Glovers ta empata e wega den di seis inning. Ambos pitcher a sa di domina e di 7 inning pa asina bay over na tiebreaker den di 8 inning. Decos ta start e di 8 cu hungado na segunda pero no ta logra score. Den bom di 8 inning cu coredo na segunda Rudi Carti ta dal un bala cu ta keda entre e catcher y pitcher pa avanza e coredo pa tercera base. E siguiente bateado cu ta Robert Haynes ta conecta un bataso pa left cu ta pica di hit pa score e caerda pa laga Deco’s den tereno. Den e otro semi-final Astros ta domina Tigers cu 15 pa dos. Astros bou maneho di Buga Blijden ta un team cu varios hungado cu a yega di hunga double A y seleccion di Aruba. Den e otro weganan Aruba Juniors ta gana Boomerang 7-2 y Florsheim ta domina Jani’s 7 pa 3. Diadomingo awo lo ta e ultimo fecha di e torneo unda lo hunga e gran final. E prome wega di dia ta programa pa cuminsa 9:30am y lo bay entre Florsheim y Aruba Juniors. Pa 11or ta topa otro Boomerang y Jani’s y pa 12:30 merdia lo tin e wega di Tigers contra Decos pa wak ken ta bay cu e di 3 luga di e torneo. E gran final lo cuminsa 2or pm y lo ta un clash entre Glovers y Astros. Glovers ta bon representa cu hungadonan manera Juni Thijsen, Marlon v/d Linden y Robert Haynes entre otro mientras cu e trabuconan di Astros ta conta cu Rafy Daniels y Norman Silvania entre otro. Pa 4or lo tin un wega amistoso entre Kimjen y Surprise. Tur fanatico di softball ta cordialmente invita pa bin Aruba Juniors pa wak e final di 60 plus. Bin apoya e streanan di antes cu keto bay ta duna espectaculo riba veld di softball. Manera ta custumber e bar y cushina di Aruba Juniors lo ta bon surti. Mi ta topa bo diadomingo awo na Aruba Juniors Ballpark.
