Na Aruba 8% di nos populacion tin diabetes En conexion cu dia mundial di diabetes, 14 november 2020, a tene un entrevista cu dokter Sharline Vis pa papia tocante e fundacion diabetes y e situacion actual cu e malesa.
Segun dokter, na Aruba di persona cu ta busca remedi pa e malesa, tin un 8809 hende, esey ta un 8% di nos populacion. Malesa di diabetes por trece cune complicacion si no trata cune adecuadamente.
Diabetes ta un problema di curpa di regulacion di sucu. “Nos curpa mester sucu pa genera energia, e sucu di mas chikito yama glucose. E glucose aki ta sak’e di nos cuminda. Manera aros, pan, batata, hariña locual ta carbohidrato”, e ta splica.
Di e sucu mas chikito, e curpa ta haci uso di e glucose aki y ta produci insulina cu ta e hormona cu ta regula esaki. Dokter Vis ta papia di mal funcion di insulina, sinembargo tin e Diabetes tipo 1 cu e organo no ta traha insulina mes, e tratamento ta bay via un pen.
E ta bisa cu 90% di caso di diabetes ta pa motibo cu e organo no ta traha adecuadamente, e problema mas grandi cu tin ta vet cu ta acumula den barica, rond higra of e organonan. Locual e Resistencia di insulina ta zorg pa insulina no acumula hopi.
Pa e motibo aki ta recomenda pa no subi di peso y recomenda tur hende pa cambia e estilo di bida mas saludabel pa asina preveni e diabetes bin ‘mester come e cantidad cu e curpa mester y keda haci movecion’.
Dokter ta recomenda pa persona keda activo 5 dia pa siman, cana, haci ehercicio ta importante. Tambe ta menciona pa baha man na alcohol y carbohidrato pa asina insulina por haci su trabou. “Mester keda regula e sucu, sino e ta daña e organo.
Nan di Fundacion diabetes kier usa e dia mundial y henter e aña pa pone mas enfasis riba importancia cu diabetes ta hunga cu calidad di bida di hende. Nan ta enfoca riba prevencion pero tambe cu hende cu tin e malesa pa asina por biba miho ‘preveni complicacion pa e malesa haci menos daño’.