Despues di deliberacion cu e compania cu ta produci coriente, N.V. ELMAR a yega na un areglo pa por ofrece un tarifa reduci na clientenan. E rebaho drastico aki ta drenta na vigor desde dia 1 di Januari 2017, pues clientenan lo nota e reduccion den e recibo cu ta sali na februari otro aña. Mester bisa cu clientenan cu ta uza e plataforma di prepago si lo nota e cambio den tarifa mesora despues di tiro!
E grupo di clientenan A-1 tabatin un tarifa di 0,4040 cu awor a baha na 0,3452. E grupo cu ta cay den e tarifa A-2 tabata paga 0,4180 awor lo paga 0,3572 mientras cu e grupo A-3 tabatin un tarifa di 0,4764 cu awor a baha na 0,4593. Den e grupo di clientenan comercial chikito a tarifa a baha for di 0,5564 pa 0,5304, mientras cu e grupo di clientenan grandi den comercio cu tabata paga 0,5354 lo paga otro aña 0,5101. E grupo “no comercial” cu tabatin un tarifa di 0,5121 lo conoce un reduccion te na 0,4889.
N.V. ELMAR ta probecha e oportunidad aki pa desea henter comunidad di Aruba feliz dianan di fiesta y cu e aña nobo trece hopi salud y prosperidad pa un y tur. Ta corda clientenan pa uza coriente consciente y eficiente pa por gosa mas di e reduccion.