Dialuna anochi a bira un warda largo pa e departamento tecnico di N.V. ELMAR, debi na dos fayo cu a presenta inesperadamente y cu a causa interupcion na dos ocasion den dos diferente area. Tecniconan, consciente di e inconveniencia cu interupcion di coriente ta causa den oranan di anochi of marduga, a activa mesora y a corigi e fayonan mas pronto posibel.
Dialuna anochi pa mas o menos pa 10:40pm a drenta melding na N.V. ELMAR cu coriente a bay den barionan di Seroe Blanco (un parti),Tarabana, Dakota (un parti), Cumana (un parti), Pavia (un parti), Sabana Blanco (un parti), Primavera, Monte Verde y Wayaca (un parti).
Mesora e tecniconan na warda a sali pa atende cu e situacion cu a presenta y a cuminsa suministra coriente bek den e areanan afecta den fase. Pa 1:11am tur cliente den e area ariba menciona tabatin coriente atrobe. Causa di e interupcion aki ta un fayo den un kabel di 12.000 Volt entre e “trafohuis” Apelsinastraat y Pampoenastraat na Dakota.
Pa 4:00am N.V. ELMAR a ricibi otro melding cu coriente a bay den vecindario di Balashi, Dieselstraat, Faradaystraat, Maxwellstraat, Pos Chikito (un parti), Yaraweg, Savaneta (un parti) y Sabana Basora (un parti). Atrobe e tecniconan na warda a sali pa atende e fayo y a cuminsa suministra coriente den fase y pa 6:37am tur cliente den e area menciona tabatin coriente bek. Causa di e interupcion aki te ainda ta desconoci.
N.V. ELMAR ta pidi su disculpa na tur clientenan cu por a keda afecta pa motibo di e interupcionnan aki.