Gerencia y empleadonan di N.V. ELMAR a celebra e hecho cu nos compania nacional di distribucion di coriente a cumpli 66 aña di existencia, brindando servicio 24 ora pa dia y 7 dia pa siman. Pa esey a prepara un treat special pa tur cliente cu a bishita nan oficinanan nan Hato y Oranjestad.
N.V. ELMAR ta considera un honor pa por sirbi comunidad di Aruba y provee un red y suministro stabiel di coriente cu ta alcansa clientenan den tur parti di nos isla. Sin perde for di bista desaroyonan y innovacion, N.V. ELMAR ta sigui cu e mesun bon energia, proveyendo clientenan cu servicio amabel y cordial.
Agregando na e puntonan di contacto di N.V. ELMAR pa su clientenan, e compania a lansa su pagina di Facebook como un plataforma pa sigui duna informacion na clientenan y comunidad en general. Tur empleado a participa diabierna cu introduccion di e pagina di Facebook bistiendo un T-shirt anunciando e pagina y invitando clientenan pa “like”.
Facebook ta wordo incorpora como e plataforma di social media mas popular na Aruba. Asina N.V. ELMAR ta amplia su canalnan y ta sigui busca comunicacion mas estrecho cu comunidad. Informacion cu ta/lo ta disponibel riba e pagina “NV ELMAR” ta informacion riba desaroyonan y innovacion, avancenan tecnologico, servicionan nobo, interupcion di coriente y na momento cu e coriente keda reconecta y informacion tocante trabaonan di mantencion. Ademas, NV ELMAR lo duna conseho y tips con pa reduci y/of mantene un consumo ideal.
“Like” NV ELMAR riba Facebook y comunica cu bo compania di coriente den un atmosfera social y amical. Sugerencianan, den cuadro di brinda mas y miho servicio na clientenan, semper ta bon bini.