Willemstad Curacao: E barku krusero MV Viking Star di e liña krusero Viking Ocean Cruises Ltd a bishitá Kòrsou siman pasá djabièrnè pa promé biaha. Durante di un asina yamá ‘inaugural call’ e Kapitan i si tripulante pa medio di su agensia ta invitá ‘stakeholdersnan’ pa un seremonia kòrtiku kaminda ta duna oportunidat pa yama e barku bon biní i tambe interkambiá plakat ku otro. Den e kaso spesífiko aki e agensia Pérez y Cía Curaçao huntu ku Minister di Finansas, Sr. Kenneth Gijsbertha , representando Minister di Desaroyo Ekonómiko, Sr. Steven Martina pa motibu ku esaki tabata di biahe pa trabou, representantenan di Curaçao Ports Authority, Ofisina di Tursimo, Kámara di Komèrsio i tambe Duana a forma parti di e seremonia aki i a interkambiá plakatnan ku e Kapitan.
E barku aki por akomodá 930 pasahero den un di na 465 kambernan espasioso i 454 tripulante. E biaha aki 815 pasahero tabata abordo di e barku ku a bishitá Kòrsou. Esaki ta nifiká ku pa kada dos pasahero tin un tripulante pa asistí i duna servisio. E diseño di e barkunan aki ta elegante i luhoso. E barku MV Viking Star ta e promé barku di e liña krusero Viking Ocean Cruises Ltd ku un largura di 228 meter, un tonahe di 47.800 GT, tin 14 dèk i a drenta servisio Aprel 2015. Loke ku ta hasi e barkunan di e Viking class diferente for di otronan ta ku nan ta ‘adults only ships’ ku un edat mínimo di 18 aña, no tin mucha ni kasino na bordo i ta inkluí ekskurshonnan na kada puerto. Su dos rumannan Viking Sea i Viking Sky a bishitá Kòrsou aña pasa den luna di Novèmber.
Riba e foto: na momentu di interkambio di plakatnan.