LONDON, Reino Uni – E individuonan cu dos copia di e mutacion genetico CCR5 Delta 32 ta sufri di un aumento di 21 % riba e tasa mortalidad, segun un estudio publica dialuna pa Nature Medicine, cu ta pone na duda e cuestion di modificacion genetico cu e cientifico Chines a realisa ariba dos baby 2018.
Debi na e cambio den e genetica, e celnan sanguineo a bira inmune na e virus VIH, pero e autornan di e investigacion aki, elabora pa e Berkley University na California, a bati e bel ariba e necesidad di comprende miho con e por afecta e salud e introduccion mutuacion genetico.
Aña pasa, He Jiankui a crea e prome babynan geneticamente modifica cu e obhetivo di imita e efecto di e mutuacion natural CCR5 Delta 32, locual a genera un controversia pa loke ta e limitenan bio etico di e practica aki y di e consecuencianan pa e salud cu esaki por trece cun’e.
Estudionan haci despues a revela cu pesonanan cu e mutuacion genetico aki por sufri di un riesgo mas grandi di haya cierto malesanan infeccioso, manera griep.
E profesor di e California Berkely University Xinzhu Wei, cu a lidera e estudio, a analisa e genotipo y e informacion riba e registro di morto di mas di 400 mil persona den e biobanco di Reino Uni pa evalua e efecto di e mutuacion CCR5 Delta 32 den e speransa di bida.
Como resultado, el a descubri cu e personanan cu ta portador homocigote di e mutuacion aki tin mas o menos un 20% menos chance di yega e edad di 76 aña, compara cu esunnan cu no tin niun tipo di e cambio genetico of ta conta cu solamente cu’n copia di e modificacion aki den nan gene.
E responsabelnan di e investigacion aki a señala cu ainda mester wordo comproba si e resultadonan por wordo transmiti pa otro poblacionnan ya cu e mutacion CCR 5 Delta 32 ta evita e entrada di e virus di AIDS den e celnan sanguineo di personanan procedente di noord- Europa of cu ascendencia di e zona aki.
