Grupo di musiconan y entretenedornan uni bao nomber di Aruba Entertainment 2020 a informa cu ayera nan tabata tin dos reunion hopi importante pa locual ta e mundo di farandula na Aruba. Nan a sinta cu minister di Labor Glembert Croes, y tambe cu Crisis Team caminda cu a trece nan preocupacionnan pa tur esnan cu ta traha den mundo di entretenimiento. Tin hopi cu ta bayendo 7 luna sin por eherce nan trabao y e situacion ta birando hopi dificil pa hopi musico, DJ y entretenedornan.
Musico, Ofo Escudero a laga sa cu tin un cantidad grandi di performers cu ta biba 100% di locual ta musica, DJ, bailamento etc pues a sinta riba tur e partinan aki. “E reunion a bay den super bon ambiente, nan a compronde tur e parti aki”, sr. Escudero ta expresa. Lo bin mas reunion acerca caminda lo bay traha cierto protocolnan pa asina tambe poco poco nan cuminsa eherce nan trabao.
https://www.facebook.com/masnoticia/videos/676068283290136/
“Ta bay parti e mundo di entretenimiento den musica soft anto despues bay poco poco na loke ta ambience music, pues loke ta bay pasa ta cu otro siman nos lo sinta atrobe cu Crisis Team pa pone protocol hunto”, sr. Escudero. Tin par musico cu si ta trahando pero e no ta nada compara cu loke e tabata ta. Hopi a wordo perdi y despues di e reunion aki nan ta sinti cu cosnan lo ta floreciendo cu e protocolnan nobo cu lo bini.