Musiconan di La Cuadra Venezolana a yega Aruba

Ayera tardi Nicaulis Alliey y su casa José Angel Escalona di La Cuadra Venezolana a yega Aruba fo’i Chicago pa cumpli cu nan compromiso cu Arubaanse Kunstkring pa duna un concierto den Cas di Cultura diadomingo mainta 11or. Awe, diasabra, e otro dos musiconan di e cuarteto lo yega Aruba.

Nicaulis y José tabata super contento di ta bek na Aruba caminda nan a yega di actua mas di tres biaha y caminda nan a forma hopi amistad. Nan a puntra pa Padú Lampe kende nan ta admira como gran musico desde cu nan a conoce personalmente nuebe aña pasa. Nan ta spera di mir’e y dun’e un abrazo fuerte.

Desde cu La Cuadra Venezolana a toca aki na 2010, e bida di José Angel y Nicaulis a experencia hopi cambio personal y crecemento profesional. Jose Angel a haya su Licienciatura den direccion di orkesta na Universidad del Zulia dirigiendo e orkesta sinfonica di e estado Falcon na Coro na 2012. Nan a casa na 2013 y un poco luna despues nan a muda pa Merca caminda Nicaulis a asisti Universidad di Nebraska y a logra su Doctorado di Musica 2016. Actualmente nan ta biba na Chicago cerca di e ruman homber di Nicaulis cu tin hopi aña ta ejerce su oficio di Medical Research aya.
Recientemente La Cuadra Venezolana a reuni na Chicago pa prepara nan mes pa e concierto na Aruba.

Bon bini na nos isla, Nicaulis y José Angel. Nos ta ansioso pa topa La Cuadra Venezolana diadomingo mainta 11or na Cas di Cultura pa scucha boso interpretacion unico di musica Venezolano y Latino Americano. Pe esnan cu no sa, e entrada ta costa 35 florin pa adulto, 15 florin pa mucha. Miembronan di Kunstkring ta paga 30 florin. Carchinan di entrada ta obtenibel solamente na Cas di Cultura prome cu e concierto. [email protected]

Comments

comments