Musiconan di Corsou kier bula Buleria for di Festival di Tumba 2019

Willemstad- Algo cu a bin ta circulando ariba rednan social y cu lo a sali den un corant na Corsou, ta e noticia caminda cu ta bisa cu musiconan na Corsou lo a reuni den silencio pa bula Buleria for di Tumba 2019.

Segun e noticia aki, dialuna ultimo den oranan laat, algun doño di agrupacionnan musical tabata tin un reunion extraordinario. Esaki tabata relaciona cu e participacion di e agrupacion musical di Aruba, Buleria den festival di Tumba na Corsou.

E corant “E Mulina” ta sigui bisa cu nan a haya informacion cu no mas cu 6 lider of gerente di 6 agrupacion musical lo a tene nan reunion den bario di Koral Specht, pa ta mas exacto na Leo. Esaki ta e sitio popular caminda cu varios agrupacion musical ta ensaya. T’asina cu a compronde cu e topico di e reunion tabata pa evita cu e agrupacion Buleria lo por participa den festival di Tumba 2019 y den futuro. Kico precies ta e problema? Of ken precies ta e problema? E agrupacion Buleria of Luw Jano?

For di moemnto cu un agrupacion di un otro pais haya e oportunidad pa por participa den un festival, sin importa cual festival, e tin mesun chance cu cualkier otro agrupacion pa gana e premio maximo. Ta mesun esfuerso y preparacionnan ta wordo haci pa duna un bon presentacion. Dicon durante e aña anterior cu a agrupacion aki a participa no tabata tin tur e esaki? E aña aki cu suerte a toca nan, cu nan a compaña un yiu di Corsou cu a sa di bende su tumba completamente. Un tumba composita y aregla door di yiunan di Corsou. Banda di esaki e agrupacion a sa di compaña e tumbero aki 100%. E agrupacion Buleria a compaña un di e tumberonan di mas exitoso den historia di Festival di Tumba, cual ta Urwin ‘Luwi’ Jano. Esaki ta nifica cu e lidernan di e agrupacionnan mester demostra un poco mas respet. Corda cu e festival di Tumba tin 48 aña ariba pia y den esunnan cu a reuni dialuna, niun di nan agrupacion no tin ni 10 aña ta participando den Festival di Tumba.
Te asina leu e relato den e corant ‘E Mulina’.

Den e programa ‘Aki Aya’ di Ruben ‘Scorpio’ Garcia, el a combersa cu e vocero di e agrupacion Buleria, kende tambe a tuma nota di e noticia aki. Hasta tabata tin rumornan ta circula cu Buleria lo a haya 40 mil florin pa bin participa den Festival di Tumba na Corsou, mientras cu agrupacionnan di Corsou mes no ta haya niun cen. Sr. Evertsz a sigui bisa cu e agrupacion Buleria ta esun cu ta core cu tur e gastonan na Corsou. Esaki ta encera pasashi pa henter e agrupacion, instrument, estadia, training, transporte, etc. Ta papiando di cifranan hopi halto.

Hopi di e musiconan aki, ta forma parti di AMAK (Asociacion di Musico Korsou), pero nan no ta presenta na reunionnan di AMAK. Nan ta spera cu AMAK bin dilanti y duna nan punto di bista. Aworaki Buleria ta spera ariba decision di AMAK, kico ta nan postura pa cu e esaki.

Foto cortesia: The Soemanta Blog

 

Comments

comments