“Semper mi tabatin fe cu e turistanan lo bolbe y e sector aki lo crece,” ta palabranan di Rookie Boekhoudt. E tabata cu su cah’i orgel na e negoshi di su ruman homber na e ruinanan di Bushiribana.
Rookie mes a traha henter su bida den sector di turismo. Na momento cu su ruman a scucha cu e prome barco crucero ta yega Aruba bek riba diaranson, mesora el a ofrece pa toca su Cah’i Orgel pa e bishitantenan.
Asina for di mainta tempran te den oranan di merdia e tabata na Bushiribana hunto cu Rudy Bremo deleitando e bishitantenan cu e música típico aki di Aruba. A duna e turistanan un splicacion di e musica, con ta traha e cah’i orgel y contesta tur e preguntanan cu nan tabatin. Hopi a saca potret eynan.
Tanto Boekhoudt como Bremo tin hopi confiansa den crecemento di turismo na Aruba. Pero e marca di Aruba mester keda den e servicio na hotel y otro areanan. E mester tin e toke di e Arubiano pa e ta exitoso.
Millenium di Celebrity Cruises tabata e prome crucero pa yega Aruba, awe, despues cu e sector tin mas cu un aña cera. E barco cu tin un capacidad di mas cu 2000 mil pasahero, a yega cu menos di mil persona mas tripulante. Segun e schedule di APA, tin mas cu 80 calls registra caba di barconan crucero pa resto di aña.