Museo Historico un biaha mas ta forma parti di e evento mas grandi di boluntario aki na Aruba.
Manera tur aña, Museo Historico ta uza e oportunidad aki, hunto cu e boluntarionan y
patrocinadornan, pa mantene y engrandece nos museo.
Mirando cu e mision di Museo Historico ta pa conserva y preserva nos historia, nos meta e aña aki ta pa trese bek e estado autentico di nos cura pafo di Fort Zoutman. Cu ayudo di
boluntarionan di e grupo di Divi Impact di Divi Resorts y tambe di Guardian Group, nos lo traha rond di e murayanan mas bieu na Aruba cu e aña aki ta cumpli nan 220 aña di existencia.
Prome cu drenta e museo, ja caba nos kier cuminsa conta e storia di nos dushi Aruba na e parti pafo di e Fort door di planta diferente mata cu tabata tin un impacto historico riba nos isla. Por ehempel, nos lo planta un mata di brasil cu a hunga un rol importante den siglo 17 y alabes duna atencion na e hecho cu awendia tin un escasez di esaki. Tambe nos lo planta matanan di Aloe ya cu esakinan tin un conexion directo cu Fort Zoutman. Na aña 1889 gezaghebber Jacob Thielen a planta 200 mata di aloe paden di e murayanan di e Fort.
Otro mata importante tabata e tuna cu a wordo planta pa cultiva e insecto cochiniya y cu a hasi su entrada na Aruba na aña 1837. Ademas di esakinan, na e antesala di nos exposicion ‘Hofi’ lo bai planta diferente mata medicinal pa asina nos por comparti e historia di curioso.
Museo Historico Aruba lo sigui sembra simia no solamente pa nos futuro generacionnan pero tambe pa awe nos para keto na e importancia di e historia cu a forma nos.