Pa expertonan loke ta tumando luga den ultimo siman y lunanan, ta un señal serio di calentamento di mundo, caminda pa hopi tempo tin debatenan tumando pa pais traha hunto pa minimalisa e daño cu principalmente industrianan ta causando na temporatura di tera.
Na Merca caba tin e fenomeno di tur aña ora cu hasta tin un ‘temporada di candela’ y e biaha aki no ta otro caminda diabierna ultimo un grito di un Hefe di Bombero a bisa hopi di e seriedad di loke ta tumando luga: “Nos a perde Greenvill” un bario chikito cu hopi edificio y centronan historico pero cu a wordo asota pa algun dia caba pa un candela monstruoso y practicamente henter e luga a kiba por completo.
Na Los Angeles autoridadnan a mustra cu tin 6164 candela registra cu ta cubri un hectare di 340.987 hectare y tur aña e candelanan na Los Angeles ta causa destruccion inmenso caminda hopi hende ta perde tur nan propiedadnan y hasta tin hende ta muri y e biaha aki e no ta diferente.
Na Russia autoridadnan a anuncia cu e candela cu ta kimando tur loke e haya den su caminda, ta cubri un tereno di 3.5 miyon hectare cual ta ekivalente na e grandura di Belgica pa asina haya un idea di e grandura di e desastre na e pais aki.
En total a registra 250 candela grandi den diferente sector caminda na Siberica na e ciudadnan di Irkoctsk yu Krasnojursk e candela a kima practicamente tur dos y a calcula cu 60 mil kilometer cuadra ta na candela y pa haci un comparacion por mustra cu Hulanda tin un superficie di 40 mil kilometer cuadra.
Na Grecia e sitaucion ta mesun cos, caminda e isla chikito di Evra ta practicamente absorba pa candela mientras cu tin candela tur rond di e ciudad grandi di Athenas pero aki autoridadnan a detene un homber y un muhe sospecha di e pega mondi na candela.
Na Argentina tin incendionan tambe expandiendo nan mes caminda tin 10 mil hectare di mondi cu ta kimando mientras cu na Turkia, Presidente Erdogan a declara cu e incendionan cu tin na e momentonan aki, ta pio den historia di e pais.
Na varios sitio mester a evacua ciudadanonan pero tambe cantidad di turistanan ya cu e situacion ta birando sumamente peligroso.