Despues cu e asociacion di companianan di construccion WAB a dicidi di freeze un CAO nobo den forma unilateral na luna di april debi na pandemia, trahadonan a keda den un limbo. Y awe ainda e CAO nobo ey no a drenta na vigor. Esaki tin e sindicato STA, cu ta representa mayoria di trahadonan den sector di construccion preocupa.
Diego de Cuba, presidente di STA, a bisa cu tur hende por corda cu construccion ta un di e prome sectornan cu a habri y trabounan a continua.
STA a sinta na mesa cu representantenan di WAB cu a pidi a sindicato duna nan un proposicion, pero esaki ta algo cu nan mester consulta cu nan miembronan prome cu por presenta algo riba mesa. Mirando cu tin un aumento cu tabata pendiente for di aña pasa, a haya cu ta prudente pa busca ayudo di Mediador di Gobierno pa sali di e impasse mas lihe posibel. “Nos kier evita cu e proceso aki ta bay dura mas largo. Nos sa cu construccion pa hopi tempo caba ta un problema debi na e competencia inhusto y nos ta compronde perfectamente e posicion di e companianan cu e competencia inhusto cu tin ta uza trahado ilegal.”
STA kier yega na un contracto cu e minimo cu tur compania den mundo di construccion mester cumpli cu esaki. De lo contrario e competencia inhusto lo sigui. Mas ainda pasobra tin di e companianan cu ta haci uzo di subcontractors. Un situacion di casi 20 aña, pa cual nan kier mira un cambio radical den e situacion. “Ta un secreto publico cu den e subcontractistanan tin hopi trahado ilegal y ta fomenta cheap labour, cu nos kier elimina na Aruba. E crisis cu nos a pasa por yuda nos limpia e situacion y bini cu regla pa tur compania di construccion. Mester evita sentimento di practica di cheap labour den construccion. Mayoria ta hende humilde di afo cu a bin traha aki. Pero nos como sindicalista no por permiti pa e tipo di abusonan aki tuma luga. Nos mester percura pa e clase obreril ta protegi.”
E carta pa haya ayudo di Mediador di Gobierno a bay caba. A pidi e ayudo rapido pasobra ta mira cu tin diferente proyecto andando den full swing. P’esey nan kier mira con ta bay haci cu e contracto cu a freeze durante mas cu un aña. “Ban sali di e impasse aki di un forma prudente pa no mester tin accion.”