Un empresa multinacional Britanico a perde mas di 25 miyon dollar despues cu un grupo di estafador a gaña e empleadonan di e sucursal di Hong Kong (China) mediante uzo di e tecnologia “deepfake”, miho bisa video, imagen of bos manipula a traves di un “software”, crea pa Inteligencia Artificial (AI).
Segun polis local, cita pa South China Morning Post, den e estafa elabora, un empleado financista a wordo engaña p’e asisti na un video-call cu loke el a pensa tabata otro miembro di e empresa, cual nomber no a wordo revela. Sinembargo, tur e presentenan den e reunion virtual, incluyendo e director financiero, tabata en realidad recreacion falso.
“(Den e) videoconferencia entre varios persona, a resulta cu tur cos cu nan a mira tabata falso,” e hoofdinspecteur principal Baron Chan Shun-ching, den un conferencia di prensa realisa diabierna ultimo, destacando cu e delincuentenan por a genera representacionnan convincente cu tabata parce y zona como un persona real cu video y audio disponibel publicamente. “Nan a uza tecnologia ‘deepfake’ pa imita bos di nan obhetivonan lesando un script,” el a agrega.
Segun a detaya, e victima a ricibi un mensahe durante januari, aparentemente di e director financiero di e compania, bisando cu e mester a ehecuta algun transaccion secreto. Mientrastanto e persona afecta a cuminsa sospecha for di un principio, pensando cu tabata trata di un e-mail ‘phishing,’ e conferencia menciona a calma su temornan, ya cu tur den e yamadanan tabata parce su coleganan y tabata papia manera nan.
Despues, e empleado a sigui e instruccionnan duna durante e reunion y a realisa 15 transferencia pa un total di 200 miyon dollar di Hong Kong (25,6 miyon dollar) na cinco cuenta bancario di e teritorio.
Polis a señala cu e estafadornan a acerca entre dos pa tres empleado di e compania cu e mesun tactica di video-call, sin duna mayor informacion riba tal encuentro. E caso, e prome di su tipo na Hong Kong, ta bao di investigacion y ainda no a realisa aresto.
