Diamars, dia 23 di October, den careda di 5’or y 34 di atardi, radarkamer di Punto di Sosten di Kustwacht Aruba, a meld cu nan a tuma nota di un boto sospechoso dentro di e awanan teritorial di Aruba riba 8.4 miya nautico di e punta oost di Aruba.
Riba peticion di e punto di sosten, Centro di Rescate y Coordinacion di Kustwacht na Corsou, a tuma nota di esaki y a manda un SuperRhib pa bay investiga. Na momento cu e tripulantenan di e boto a mira e SuperRhib, nan a purba di huy.
Mirando e reaccion di e tripulantenan y riba e manera cu e embarcacion, un boto tipo “Yola” tabata moviendo, a lanta e sospecho cu posiblemente lo tabata trata di un transporte di droga y/of arma. Durante e persecucion a laga algun tiro di advertencia pa asina obliga e embarcacion pa e por para.
Banda di 6’or y 40 di atardi, a sigui un intercepcion di e embarcacion. Tabata tin tres persona abordo. Finalmente tabata trata aki di piscadonan Venezolano cu tabata eherciendo piscamento ilegal. Nan tabata purba ainda pa corta e cabuyanan di e Palambras, cu nan tabata piscando cun’e. E tres personanan aki a wordo deteni y e boto a wordo hiba na e pier di e punto di sosten.
Officier van Justitie a impone un boet di 15 mil florin. E boto a wordo confisca y e tres personanan a wordo deporte awe, diaranson pa nan pais.
Door di no paga e boet, e boto lo wordo distrui den e proximo simannan. Punto di sosten di Kustwacht Aruba ta indica cu nan como nan partnernan manera KPA, Imigracion, Kust Surveillance y Douane, lo keda alerta mirando tur e actividadnan ilegal cu ta tumando luga riba lama y na costanan di Aruba.
