MAASLUIS, Hulanda – Dos muhe di 21 y 22 aña for di Oss, siman pasa a wordo deteni debi na extorsion di un homber di 26 aña for di Maassluis cu un video di sex.
E mester a paga placa pa evita cu esaki wordo haci publico. Polis a laga sa cu e dos muhenan a laga sa cu nan a yega di haci esaki caba, pero cu nunca un keho a wordo duna.
Chantahe despues di bishita riba sexsite
E homber a wordo chantahea despues cu el a bishita un website di sex. En busca di muhe el a topa cu un propaganda caminda di e dos sospechosonan y el a wordo convenci pa kita paña riba webcam. Un poco despues, e menasanan a cuminsa.
E homber mester a paga 800 euro pa asina evita publicacion. Pero ora cu el a wordo menasa atrobe, el a yama polis. Via un investigacion riba internet y via datonan di banco, polis a logra haya e identidad di e dos muhenan.
Fuente: RTL Nieuws